TIC YAWAOMBA WATANZANIA KUTUMIA MWAKA 2024 ULIOWEKWA WAKFU KUANZISHA UWEKEZAJI WA MIRADI

Meneja Uhamasishaji Uwekezaji wa Ndani wa Kituo cha Uwekezaji Tanzania (TIC) Felix John (wa pili kushoto), akizungumza na Wawekezaji wa Kiwanda cha Wild Flower,Grains and Oil Mill Project cha Mkoa wa Singida, Januari 15, 2024 wakati wa kampeni ya kitaifa ya uhamasishaji wa uwekezaji wa ndani mkoani Singida iliyofanywa na kituo hicho.

................................................................

Na Dotto Mwaibale, Singida

KITUO cha Uwekezaji Tanzania (TIC) kinawaomba Watanzania kuutumia mwaka 2024 ambao umewekwa wakfu kwa ajili ya uwekezaji hapa nchini hivyo wasiache upite bila ya kuchangamkia fursa hiyo adhimu.

Hayo yamesemwa na Meneja Uhamasishaji Uwekezaji wa Ndani wa kituo hicho Felix John wakati akizungumza na waandishi wa habari wa Mkoa wa Singida Januari 15, 2024 kwenye kampeni ya kitaifa ya uhamasishaji wa uwekezaji wa ndani.

John alisema lengo la kampeni hiyo ni utekelezaji kwa vitendo wa ilani ya uchaguzi ya Chama Cha Mapinduzi (CCM) na kuiunga mkono kampeni hiyo iliyozinduliwa rasmi Septemba 25, 2023 na Waziri Mkuu Kassim Majaliwa jijini Dar es Salaam.

Alisema kampeni hiyo moja ya lengo lake kuu ni kubadilisha fikra zilizodumu kwa muda mrefu miongoni mwa Watanzania ambao wanaposikia dhana ya uwekezaji wanafikiri inawalenga wageni au wazungu na ndio maana imeanzishwa ili nao waweze kuwekeza katika miradi mbalimbali na kushiriki kuinua uchumi wao na nchi kutokana na fursa zilizopo kwenye maeneo yao.

Alisema kujitokeza kwao katika uwekezaji ni kuunga mkono adhima ya Rais Dkt. Samia Suluhu Hassan ya kumtaka kila mtanzania kushiriki katika uchumi wa nchi kupitia uwekezaji.

John alisema Waziri wa Uwekezaji Profesa Kitila Mkumbo alisema hivi sasa asilimia 46 ya uwekezaji hapa nchini ni wa wazawa na asilimia 29 ni wageni na kuwa miradi inayofanywa kwa ubia kati ya watanzania na wageni ni asilimia 26..

Aidha, John alisema maboresho yaliyofanywa na Rais Samia ya ubadilishwaji wa sheria na kupunguza viwango vya mtaji imesaidia kuongeza idadi ya wawekezaji wanaosajiliwa TIC baada kuanza kutekelezwa kwa sheria hiyo mpya ya uwekezaji ya mwaka 2022 ambayo imepunguza thamani ya mtaji unaohitajika kwa mwekezaji wa ndani kutoka Dola za Kimarekani 100,000 hadi 50,000 kwa ajili ya kuwavutia wawekezaji wa ndani.

Alisema sheria hiyo namba 10 ya 2022 inatambua wawekezaji mahiri nakupewa vivutio vya uwekezaji na kuwa wale wenye sifa wanapewa misamaha ya kodi kwa kuwa ndani ya kipengele hicho cha umahiri.

Alisema hivi sasa suala zima la uwekezaji limebadilika kwa kasi kubwa na Rais Samia Suluhu Hassan kuonekana ni kinara na namba moja kutokana na nchi kuwa na sheria hiyo ambayo inawavutia wawakezaji wengi.

Mkuu wa Mkoa wa Singida, Peter Serukamba alisema TIC kuanzisha kituo cha utoaji huduma mahali pamoja ‘ One Stop Facilitation Centre’ ni hatua nzuri katika kumsaidia mwekezaji kwani akifika TIC atapata huduma zote za usajili kutoka taasisi zinazohusika kama TBS na TRA hivyo kumpunguzia mlolongo uliokuwepo hapo zamani wa kufuata huduma hizo kwenye taasisi hizo.

Msimamizi wa Kiwanda cha Wild Flower,Grains and Oil Mill Project, Jamal Juma, alisema kiwanda hicho kitakapo kamilika ujenzi wake kitatoa ajira za kudumu 190 na za muda mfupi zitakuwa zaidi ya 400 na kwamba wakulima zaidi ya 10,000 wa Mkoa wa Singida watanufaika na kiwanda hicho chenye uwekezaji wa zaidi ya Sh.bilioni 56.

Kwa upande wake Mkurugenzi wa kiwanda hicho, Khalid Ally Omary (Shullu), kupitia Mkuu wa Mkoa wa Singida, Peter Serukamba alimuomba Rais Samia Suluhu Hassan awe mgeni rasmi na kukifungua kiwanda hicho mara ujenzi wake utakapo kamilika.

Naye Meneja wa TIC Kanda ya Kati, Venance Mashiba alipongeza kampuni hiyo kwa kukamilisha ujenzi wa kiwanda hicho kwa wakati kwani kinakwenda kuinua uchumi wa nchi hasa baada ya kuzingatia ushauri uliokuwa ukitolewa na TIC.

Kaimu Katibu Tawala Msaidizi upande wa Viwanda na Biashara Mkoa wa Singida, Lucas Mkuki aliwakaribisha wawekezaji kuja kuwekeza Mkoa wa Singida kwani Jiografia yake inaufanya iwe kivutio kikubwa na kuwa na miundombinu mizuri ya barabara pamoja na maeneo ya kilimo ya kutosha.

Mkurugenzi wa Shule za Lake, John Augustino ambaye ni mmoja wa wakezaji Mkoa wa Singida aliishukuru sana TIC kwa ushirikiano mkubwa walioutoa kwake hadi kufikia hatua hiyo kubwa aliyonayo hasa katika msaada ya vifaa vya ujenzi, magari na ushauri ambapo aliwaomba wafanyabiashara wa Mkoa wa Singida kwenda kusajili biashara zao TIC ili zitambulike.

Meneja wa TIC Kanda ya Kati, Venance Mashiba, akizungumza katika kampeni hiyo.

Msimamizi wa kiwanda hicho Jamal Juma akitoa taarifa ya ujenzi wa kiwanda hicho.

Mkurugenzi wa kiwanda hicho cha Wild Flower,Grains and Oil Mill Project , Khalid Ally Omary (Shullu), akizungumza wakati wa kampeni hiyo ambapo alimuomba Mkuu wa Mkoa wa Singida kumuomba, Rais Samia kukifungua kiwanda hicho mara ujenzi wake utakapo kamilika.