MBUNGE SIMA ATOA SH. 200,000 KUSAIDIA MAKUNDI MBALIMBALI MWEZI MTUKUFU WA RAMADHANI

Mbunge wa  Singida mjini Mussa Sima (kushoto) akimkabidhi Sheikh wa Mkoa wa Singida, Issa Nassoro Sh.200,000 kwa ajili ya kusaidia makundi mbalimbali ya watu wakiwemo yatima, wajane, wazee na wafungwa katika kipindi hikicha Mwezi Mtukufu wa Ramadhani.

Na Dotto Mwaibale, Singida

MBUNGE wa Singida mjini Mussa Sima ametoa Sh.200,000 kwa ajili ya kusaidia makundi mbalimbali ya watu wakiwemo yatima, wajane, wazee na wafungwa katika kipindi hiki cha Mwezi Mtukufu wa Ramadhani.

Sima alitoa msaada huo baada ya Ofisi ya Sheikh Mkoa wa Singida kupitia kamati maalumu ijulikanayo kwa jina la Nusratan al Ummati Singida kumuandikia barua ya kumuomba kuchangia chochote alichonacho kwa ajili ya makundi hayo.

Kamati hiyo inajishughulisha kutoa huduma kwa wajane, mayatima, wafungwa, wazee, watu wenye mahitaji maalumu na vyuo mbalimbali.

Katika sehemu ya barua hiyo iliyoandikwa na kamati hiyo iliandikwa “Tunayofuraha kuwaomba mahitaji haya kwenu kwani tunawahitaji wengi kama binadamu tunapaswa kupendana, tuhurumiane, tukumbukane na tukumbushane kama Mungu anavyotuelekeza” ili eleza sehemu ya barua hiyo.

Mahitaji ya kamati hiyo katika kipindi hiki cha Mwezi Mtukufu ni kupata mchele tani 5, sukari tani moja, mafuta lita 1000, maharage tani mbili, viazi tani mbili na kuwa mtu yeyote atakaye kuwa tayari kuchangia kwa chakula anaweza kupeleka ofisi ya sheikh wa mkoa na yule ambaye atapenda kutoa fedha anaweza kuingiza katika akaunti NUSRATUN AL UMMATI Singida namba 01527146400 Bnki ya CRDB.

Akizungumza baada ya kupokea msaada huo Sheikh Mkoa wa Singida, Issa Nassoro alimshukuru Mbunge Sima na kueleza kuwa watu wengine na wabunge wenzake nao wanaombwa kusaidia makundi hayo kwa chochote watakacho jaaliwa na Mwenyezi Mungu kwani kutoa ni moyo na si utajiri.

Kwa mtu yeyote atakayekuwa tayari kuchangia anaweza kuwasiliana na Katibu wa Baraza la Masheikh Mkoa wa Singida kwa namba ya simu 0757713272 au 0713378249.