MBUNGE MTATARU ATOA SARUJI MIFUKO 400 KUSAIDIA UJENZI WA HOSTELI JIMBONI

Mbunge wa Jimbo la Singida Mashariki, Miraji Mtaturu akiwakabidhi viongozi wa Kata ya Misughaa mifuko ya saruji 400 yenye thamani ya zaidi ya Sh.Milioni 8 kwa ajili ya kusaidia ujenzi wa hosteli ya Shule ya Sekondari ya Dk. Ali Mohammed Shein iliyopo Kata ya Misughaa wilayani Ikungi  Mkoa wa Singida katika hafla iliyofanyika jana May 8, 2023.

Na Dotto Mwaibale, Singida

MBUNGE wa Jimbo la Singida Mashariki, Miraji Mtaturu ametoa mifuko ya saruji 400 yenye thamani ya zaidi ya Sh.Milioni 8 kwa ajili ya kusaidia ujenzi wa hosteli ya Shule ya Sekondari ya Dk.Ali Mohammed Shein iliyopo Kata ya Misughaa wilayani Ikungi  Mkoa wa Singida.

Mbali ya kukabidhi saruji hiyo pia ametoa kompyuta nne pamoja na Projekta moja ili iweze kuwasaidia wanafunzi wa shule hiyo ambayo ni miongoni mwa shule zinazofanya vizuri kimasomo wilayani humo.

Akizungumza wakati akikabidhi saruji hiyo Mtaturu alisema ni utekelezaji wa ahadi yake aliyoahidi ili kuanza ujenzi wa hosteli hiyo haraka iwekanavyo kwa ajili ya kuwasaidia wanafunzi wa shule hiyo hasa wa kike kuwapunguzia kutembea umbali mrefu kufika shuleni.

"Leo hii nimeleta saruji mifuko 100 kwa ajili ya uzinduzi wa ujenzi na mifuko yote 400 nimekwisha ilipia na lengo langu nataka tuanze haraka kufanya mchakato wa ujenzi ikiwa ni  utekelezaji wa ilani ya Chama Cha Mapinduzi (CCM)

Mtaturu alisema imeletwa mifuko hiyo 100 kwa ajili ya kuanza kazi hiyo huku akihofia ikipelekwa inaweza kuharibika na kuwa hasara kwani jambo hilo siku za nyuma kabla ya kuwa mbunge lilikwisha tokea katika moja ya kata ambapo mifuko zaidi ya 60 iliganda kutokana na kuchelewa kuitumia.

Mbunge Mtaturu alisema kazi hiyo inafanyika ikiwa ni kumuunga mkono Rais Dk.Samia Suluhu Hassan ya kuboresha miundombinu ya shule ili watoto wasome katika mazingira bora chini ya kauli mbiu ya Serikali ya kutoa elimu bure kuanzia shule ya msingi hadi sekondari.

"Rais wetu Samia amefanya kazi kubwa ya kutoa fedha nyingi katika nchi yetu kwa ajili ya kutekeleza miradi mingi ya maendeleo na jimbo letu la Singida Mashariki likiwa ni mnufaika ya fedha hizo hivyo sisi tukiwa ni wawakilishi wa wananchi  tunakila sababu ya kumuunga mkono kwa kumsaidia," alisema Mtaturu.

Mtaturu akizungumzia shughuli za maendeleo  alisema baada ya miezi miwili ijayo kata hiyo itakuwa imepata umeme kwani kazi kubwa anayoifanya mkandarasi hivi sasa ni kupeleka nyaya na kufunga transifoma baada ya kufikisha nguzo.

Akizungumzia kuhusu miradi ya barabara alisema Rais Samia ametoa fedha kwa ajili ya ujenzi wa barabara ya kilometa 460 ya kiwango cha lami ambapo ujenzi wake unatarajiwa kuanza mara moja kuanzia Njiapanda, ambayo itapitia Makiungu, Misughaa, kwa Mtoro hadi Kibrash mkoani Tanga.

Alisema hivi sasa unafanyika mchakato wa kumpata mkandarasi mwenye sifa ili kazi hiyo ianze kufanyika na kuwa kukamilika kwa barabara hiyo kutainua uchumi wa wananchi itakapita.

Kuhusu sekta ya kilimo alisema Wizara ya Kilimo chini ya Waziri Hussein Bashe imeahidi kutoa mbegu za ruzuku za alizeti kwa ajili ya kuwasaidia wakulima ili kuongeza uzalishaji na kuwainua kiuchumi.

Aidha, Mtaturu alisema Serikali imedhamilia kuliendeleza zao la kibiashara la pamba kwa kuleta viatilifu na kuwa na bei nzuri na kuhakikisha barabara zote zinazopita kwenye maeneo ya mashamba hayo zinapitika ili kusaidia kusafirisha mazao hayo kwenda kwenye soko.

Mkuu wa shule hiyo Jackson Maruma alimshukuru mbunge huyo kwa msaada alioutoa na kueleza kuwa sio mara yake kufanya hivyo kwani aliwahi kutoa kompyuta tano lakini ni mbili tu ambazo zinatumika kutokana na kukosekana kwa umeme na sasa tena ametoa projekta moja na kompyuta nne nyingine.

Pia mkuu wa shule hiyo alisema Mtaturu ameweza kufanikisha kupatikana kwa mnara wa simu wa Shirika la Simu Tanzania (TTCL) ambapo sasa wanapata huduma ya intaneti katika kata nzima na shule hiyo ikinufaika kwa kufundishia wanafunzi masomo mbalimbali.

Mwenyekiti wa bodi ya shule hiyo, Athuman Kitiku akizungumza wakati akitoa shukurani kwa mbunge huyo alisema maboresho yaliyofanywa katika shule hiyo hayawezi kumfanya mzazi ambaye mtoto wake anasoma hapo aweze kujuta na kuwa mbunge huyo anamchango mkubwa wa maboresho hayo.

Mbunge wa Jimbo la Singida Mashariki, Miraji Mtaturu akimkabidhi Projekta Mwalimu wa TEHAMA wa  shule hiyo Naomi Richard aliyoitoa kwa ajili ya kusaidia wanafunzi wa Shule ya Sekondari ya Misughaa.

Muonekano wa saruji iliyotolewa na mbunge huyo.

Mkuu wa Shule hiyo, Mwalimu Jackson Maluma akitoa taarifa ya shule hiyo kwa Mbunge Mtaturu.

Mwenyekiti wa bodi ya shule hiyo, Athumani Kitiku akichangia jambo kwenye hafla hiyo

Mbunge Mtaturu akisalimiana na wana CCM na wananchiwa kata hiyo baada ya kuwasili kwenye hafla ya kukabidhi saruji hiyo.

Wanafunzi na wananchi wakiwa kwenye hafla hiyo.

Afisa Mtendaji wa kata hiyo, Elineema Abel akizungumza kwenye hafla hiyo.

Diwani wa Viti Maalumu wa Kata hiyo, Ester Kimoho akichangia jambo kwenye hafla hiyo.

Taswira ya hafla hiyo.

Viongozi wakiwa meza kuu.

Mbunge Mtaturu akizungumza na wananchi wakati akikabidhi msaada huo.

Mbunge Mtaturu akikadhi msaada wa kompyuta nne katika hafla hiyo. Kulia ni Diwani wa Kata hiyo, Seleman Itambu Musa.

Kompyuta na Projekta moja zikikabidhiwa na Mbunge Mtaturu.

Mbunge Mtaturu na viongozi wa CCM na Wanacha wa chama hicho Kata ya Misughaa wakiwa katika picha ya pamoja.