MWENYEKITI JUMUIYA YA WAZAZI CCM WILAYA YA UYUI ATOA MSAADA WA VIFAA TIBA

Mwenyekiti wa Jumuiya ya Umoja wa Wazazi wa Chama Cha Mapinduzi (CCM) Wilaya ya Uyui mkoani Tabora, Shafin Sumar Mwanamamlo (kushoto), akikabidhi, vifaa tiba vyenye thamani ya Sh. Milioni 28 kwa ajili ya kusaidia kutoa huduma kwenye Zahanati za wilaya hiyo. Katikati ni Mbunge wa Jimbo la Igalula, Venant Protaus na kulia ni Mganga Mkuu wa Wilaya ya Uyui, Winde Robert.

............................................

Na Moses Mabula Tabora

MWENYEKITI  wa Jumuiya ya Umoja wa Wazazi wa Chama Cha Mapinduzi (CCM) Wilaya ya Uyui mkoani Tabora, Shafin Sumar Mwanamamlo ametoa vifaa tiba vyenye thamani ya Sh. Milioni 28 kwa ajili ya kusaidia kutoa huduma kwenye Zahanati za wilaya hiyo.

Vifaa hivyo amevikabidhi kwenye sherehe za   Umoja wa Wazazi ambayo imefanyika katika Kijiji Cha Mmale Kata ya Miyenze wilayani humo Januari, 28, 2024.

Akikabidhi vifaa hivyo kwa mgeni rasmi ambaye ni Mwenyekiti wa Umoja wa Wazazi Mkoa wa Tabora, Robert Kamoga, Mwanamamlo alisema yeye kama kiongozi wa jumuiya hiyo ameguswa na kwamba anatambua umuhimu wa afya ya kila mtu hivyo akaona ni vema afanye hivyo ikiwa ni njia mojawapo ya kusaidia jamii hasa katika upande wa afya.

"Mimi kama Mwenyekiti na kamati yangu ya jumuiya ya wazazi wilaya ya Uyui, tumeona nivema tutoe vifaa hivi ili viweze kusaidia wajawazito wasipoteze maisha yao kwa kukosa vifaa tiba," alisema Mwanamamlo.

Aidha, Mwanamamlo alisema kuwa CCM kupitia Mwenyekiti wake wa Taifa Dkt Samia Suluhu Hassan  kimefanya mambo mengi makubwa ikiwemo ujenzi wa Zahanati vituo vya afya na madarasa ya shule za Sekondari na msingi kwa nchi nzima.

Mwanamamlo aliwataka wananchi kuendelea kukiamini Chama Cha Mapinduzi kwa vile chama hicho kinatekeleza ahadi zake kama kinavyoahidi kwenye kampeni zake wakati wa uchaguzi mkuu na kwamba ndio mkombozi kwao.

Kwa upande wake Mganga Mkuu wa Wilaya ya Uyui, Winde Robert alimshukuru Mwanamamlo na kamati yake kwa msaada huo na kuwa ni wajibu wa watumishi wa sekta ya afya kwenda kuvitunza ili viweze kufanya kazi kwa muda mrefu ukizingatia kuwa vifaa hivyo vinanunuliwa kwa fedha nyingi.

Vifaa tiba vilivyotolewa na Mwanamamlo ni viti mwendo vitatu vitanda kwa ajili ya kujifungulia wajawazito na taa zinazotumika wakati wajawazito wakijifungua.

Muonekano wa vifaa hivyo vilivyo kabidhiwa.

Muonekano wa vitanda vilivyo kabidhiwa.