Na Dotto Mwaibale, Singidani Blog
VILIO Simanzi na huzuni vilitawala katika ibada ya mazishi ya Bibi
Elizabeth Mwamkumbi Kimoho (96) Mkazi wa
Kijiji cha Ihanja Wilayani Ikungi mkoani Singida ambaye imeelezwa kuwa yeye
pamoja na mume wake Marehemu Andrew Duma aliyekuwa Mchungaji wa Kanisa
la The Free Pentecostal Church of Tanzania Jimbo la Singida ni waasisi wa kanisa hilo katika
kijiji hicho na wakuu wa imani ya Mungu.
Askofu wa kanisa hilo Jimbo
la Ikungi, Mchungaji Yeremia Samwel akizungumza katika ibada hiyo iliyofanyika
Februari 12, 2024 katika Kanisa la FPCT Parishi ya Ihanja alisema Elizabeth na
mume wake Andrew Duma walikuwa ni wakuu wa Mungu kutokana na kazi kubwa
walioifanya ya kueneza imani katika kijiji hicho na Singida kwa ujumla.
Askofu wa Kanisa la FPCT, Jimbo la Ikungi, Yeremia Samwel .
---------------
"Bibi huyu ambaye tunamuaga leo hapa alikuwa akisaga mahindi na mboga
kavu za majani kwa kutumia jiwe la asili na kuandaa chakula kwa ajili ya
wachungaji walipokuwa kwenye vikao na mikutano mbalimbali," alisema
Mchungaji Samwel..
Samwel alisema Bibi Elizabeth ni mke
wa kwanza wa mchungaji ndani ya kanisa hilo katika Mkoa wa Singida na kupitia
utumishi wao pamoja na mume wake wameweza kuzalisha maaskofu na wachungaji
katika maeneo mbalimbali ya Mkoa wa Singida hasa katika majimbo yao matatu ya
Ikungi, Irongelo na Singida mjini.
Alisema mbali ya kuzalisha watumishi wengi ndani ya Mkoa wa Singida pia
walifanikisha mchungaji waliokuwa wakimlea kiimani kwenda
kuanzisha huduma mkoani Iringa ambapo kwa sasa ni Askofu wa kwanza wa kanisa hilo mkoani humo.
"Ninamfahamu vizuri bibi huyu alikuwa hana maneno mengi na alikuwa
mkarimu kwa wageni na alipokuwa akipita maeneo ya Ikungi ambayo wakati huo
hayakuwa na kanisa hata moja alikuwa akisikitika huku apaza sauti ya kuomba
kuanzishwa kwa kanisa haraka ili watu wamjue Mungu, alisema Samwel.
Samwel alisema kuwa Bibi Elizabeth hajafa bali amelala kama alivyolala
Mfalme Daud anayetajwa kwenye biblia na kuwa ipo siku ataamka.
Aidha, Samwel aliwataka wakristo kumuenzi bibi huyo kwa kufanya mambo mazuri
ya kumpendeza Mungu hasa akawaomba wanafamilia yake hasa wajukuu kufuata nyayo
zake.
Makamu Askofu wa kanisa hilo, Jimbo la Ikungi, Mchungaji Simoni Jingu, akizungumza kwenye ibada hiyo.
Askofu Amosi Maghasi
/////////
Askofu Amosi Maghasi wa kanisa hilo Jimbo la Singida aliwataka wakristo
kuendelea kujiandaa na kuwa watu wema na
watakatifu kama alivyokuwa bibi Elizabeth na alitumia nafasi hiyo kuwaomba
waandishi wa habari si kuandika habari nzuri tu za wanasiasa kwa ajili ya
kulipwa mishahara bali pia waandike habari njema za Mungu.
Waandishi wa habari Mkoa wa Singida wakiweka shada la maua kwenye kaburi la Bibi Elizabeth Kimoho.
Askofu wa Jimbo la Ilongero, Abdoni Samsoni.
------------------
Kwa upande wake Askofu wa Jimbo la Irongero, Abdoni Samsoni alisema watu wote waliokuwepo kwenye ibada hiyo na wengine wote wana jambo la kujifunza kupitia kifo cha Bibi Elizabeth kutokana na mambo mazuri aliyoyafanya.
Askofu Mstaafu wa kanisa hilo Jimbo la Irongelo, Wilson Lazaro alisema
wakristo wana kila sababu ya kuendelea kujifunga mkanda kwa kuyaenzi mambo yote
mazuri aliyokuwa akiyafanya bibi Elizabet Kimoho ambaye mwisho wa maisha yake
hapa duniani ameumaliza vizuri.
Lazaro alitumia nafasi hiyo kuiomba
jamii na wakristo kuendelea kuwa na imani na kufanya mema kama alivyokuwa
akifanya Mchungaji Duma na mke wake jambo litakalosaidia nchi kuwa na utulivu na
amani.
Aidha, Askofu Lazaro alitumia nafasi hiyo kutoa nasaha kwa jamii kuwajibika
kuwatunza wazee kwani hata wao ni wazee watarajiwa wa kesho na kuwa kifo kipo
kwa kila mmoja changamoto iliyopo ni kujua ni nani atatangulia hilo ndio fumbo
kubwa la Mungu.
Askofu Mstaafu, Jacob Nyika alisema marehemu Mchungaji Andrew Duma na mke
wake Elizabeth Kimoho wamefanya kazi kubwa ya kueneza imani hivyo wanawajibu wa
kuwaenzi kwa kufanya kazi kwa pamoja na ushirikiano katika majimbo yao yote
hayo matatu kuanzia ngazi ya maaskofu hadi wachungaji.
Diwani wa Kata ya Ihanja, Mohamed Igae
Kwa upande wa viongozi wa Serikali Diwani wa Kata ya Ihanja, Mohamed
Igae na Mwenyekiti wa kijiji hicho, Juma
Memba wakizungumza kwa nyakati tofauti katika ibada hiyo wakati wakitoa salamu
za rambirambi kwa wafiwa waliiomba jamii kuyaenzi yale yote mazuri yaliofanywa
na watumishi hao wa Mungu Elizabeth na marehemu mume wake Mchungaji Andrew
Duma.
Mwenyekiti wa Kijiji cha Ihanja, Juma Memba
Viongozi hao kupitia Mganga Mkuu wa Kituo cha Afya cha Ihanja walitumia
fursa ya ibada hiyo kuwaomba wananchi kuwapeleka watoto wao waliochini ya umri
wa miaka mitano kupata chanzo ya Surua itakayoanza Februari 15, 2024 hadi
Februari 18, 2024.
Akisoma historia ya marehemu Mchungaji Elikana Mkuki wa Kanisa hilo Kijiji
cha Ihanja, alisema Bibi Elizabeth Mwamkumbi Kimoho alizaliwa Mei 2, 1928
katika Kitongoji cha Misake Kijiji cha Minyughe Wilaya ya Ikungi Singida.
Mchungaji, Elikana Mkuki
Alisema Marehemu alifunga ndoa ya kimila mwaka 1944 na Andrew Duma ambapo
walijaaliwa kupata watoto tisa, waliofariki ni watatu wakiume wawili na wa kike
mmoja na ambao wapo hai ni sita wakike watatu na wakiume watatu, mmoja wao ni
Mwandishi wa habari Mkoa wa Singida, Nathaniel Limu.
Akizungumzia suala la imani alisema marehemu aliokoka mwaka 1964 katika
Kanisa la FPCT Parishi ya Ihanja na alianza utumishi wake na mume wake Andrew
Duma mwaka 1965 na waliteuliwa kuwa wachungaji mwaka 1969.
Mchungaji Mkuki alisema walifanya kazi ya utumishi Kijiji cha Minyughe,
Mtamaa, Singida mjini, Sagara na maeneo mengine mbalimbali ndani ya Mkoa wa
Singida.
Mchungaji Mkuki akizungumzia maradhi ya marehemu kuwa alianza kuugua mwaka
2022 baada ya kuvunjika mguu na tangu hapo hali yake ya kiafya iliendelea
kutetereka ambapo alipelekwa Hospitali mbalimbali kwa ajili ya matibabu lakini
hali yake ilizidi kuwa mbaya kutokana na maumivu ya mguu na Februari 9, 2024
majira ya saa 3 na nusu asubuhi alifariki dunia.
Marehemu ambaye alikuwa na umri wa miaka 96 ameacha watoto sita, wajukuu 13 na vitukuu 14.
Bwana alitoa na Bwana ametwaa jina lake libarikiwe.
Muonekano wa Kanisa la Free Pentecostal Tanzania la Kijiji cha Ihanja lililoasisiwa na marehemu Elizabeth Kimoho na Mume wake Andrew Duma ambao wamepewa heshima ya kuzikwa kwenye makaburi ya kanisa hilo.
0 Comments