WAZIRI MKUU KASIMU MAJALIWA AONGOZA MAZISHI YA MWENYEKITI WA CCM MKOA WA TABORA

Waziri Mkuu wa Jamhuri ya Muungano wa Tanzania, Kassim Majaliwa akitoa salamu za rambirambi wakati akiongoza mamia ya waombolezaji mkoani Tabora katika mazishi ya aliyekua Mwenyekiti wa Chama Cha Mapinduzi ( CCM) Mkoa wa Tabora na Mjumbe wa Kamati Kuu ya CCM Taifa Mzee Hassain Wakasuvi ambaye amezikwa leo Februari 24, 2024 mkoani humo.

............................................

Na Nyamizi Moses, Tabora 

WAZIRI  Mkuu wa Jamhuri ya Muungano wa Tanzania, Kassim Majaliwa ameongoza mamia ya waombolezaji na viongozi mbalimbali mkoani Tabora katika mazishi ya aliekua Mwenyekiti wa Chama Cha Mapinduzi ( CCM) Mkoa wa Tabora na Mjumbe wa Kamati Kuu CCM Taifa Mzee Hassain Wakasuvi ambaye amezikwa leo Februari 24, 2024 nyumbani kwake Kata ya Mabama wilayani Uyui mkoani Tabora.

Katika hotuba yake Majaliwa aliwataka wana CCM na Wananchi wa Mkoa wa Tabora kuyaenzi yale yote mema aliyoyafanya Mzee Wakasuvi na kuishi kwa upendo.

   "Mimi niliwahi kuishi na mzee wakasuvi kwa Muda wa miaka minne wakati huo nikiwa kama Mkuu wa wilaya ya urambo,kiukweli ni mzee ambae alikua mwalimu wa siasa kwangu,alikua mtumishi mwema katika kazi yake na hakua na tamaa wala kubagua mtu hivyo niwasihi ndugu zangu tuyaenzi yale yote mema Ambayo ametuachia mzee wetu" alisema Majaliwa.

Kwa upande wake Mjumbe wa Halmashauri Kuu (MNEC) Mkoa wa Tabora ,Hemed Nassoro Hamdan alisema CCM italinda na kuheshimu yale yote aliyoyafanya wakasuvi kipindi cha uhai wake na kuwataka wanachama kufuata nyayo za Wakasuvi.  

    "sisi kama viongozi wa mkoa tuliobaki tutayaenzi na kuyatunza yale Ambayo mzee wetu aliyapenda na tutahakikisha tunafuata nyayo zake,kwa upendo na mshikamano,na niwahakikishie ndugu zangu Ccm itajitahidi tupate Tena mtu mwenye ufanyaji kazi na mshupavu kama Marehemu mzee wetu Wakasuvi,hivyo Tujitahidi kuwa watulivu kwa sasa na kushikamana". alisema Hamdan.

Nao viongozi wa dini mkoani hapa Askofu Kisiri Laizer na Sheikh Mavumbi wamesema marehemu ameacha pengo kubwa kwao kwani alikua ni mtu wa kujitoa katika masuala ya dini na pia alikua ni mtu mwenye ukweli na msimamo katika dini na hakuwahi kubagua dini yoyote.

Marehemu mzee Wakasuvi alifariki dunia fEBRUARI 22, 2024 katika Hospitali ya Rufaa ya Mkoa wa Tabora Kitete wakati akipatiwa matibabu  baada ya kuumwa shinikizo la damu.

Waziri Mkuu wa Jamhuri ya Muungano wa Tanzania, Kassim Majaliwa akimpa pole mjane wa aliyekuwa Mwenyekiti wa Chama Cha Mapinduzi ( CCM) Mkoa wa Tabora na Mjumbe wa Kamati Kuu CCM Taifa Mzee Hassain Wakasuvi.

 Waziri Mkuu wa Jamhuri ya Muungano wa Tanzania, Kassim Majaliwa akishiriki kumuombea dua  aliyekuwa Mwenyekiti wa Chama Cha Mapinduzi ( CCM) Mkoa wa Tabora na Mjumbe wa Kamati Kuu CCM Taifa Mzee Hassain Wakasuvi wakati wa shughuli za mazishi yake yaliyofanyika leo.