MEYA YAGI KIARATU ANAVYOIPAISHA MANISPAA YA SINGIDA KIMAENDELEO

Mstahiki Meya wa Manispaa ya Singida, Yagi Kiaratu, akiongoza moja ya Baraza la Madiwani Manispaa ya Singida.

..................................

Na Dotto Mwaibale, Singida

MANISPAA ya Singida ni moja ya mji ambao unakua kwa kasi na hali hiyo inatokana na uongozi thabiti wa viongozi ambao wameweza kuiongoza manispaa hiyo.

Mwanamama Yagi Kiaratu ndiye Mstahiki Meya wa Manispaa ya Singida anayeubadilisha mji wa Singida kwa kasi kubwa akishirikiana na madiwani, mkurugenzi, mkuu wa wilaya na wananchi.

Kwa mtu yeyote anayeishi Singida anaweza kuwa shahidi wa kasi ya maendeleo yanayoonekana katika mji wa Singida chini ya Mstahiki meya huyo kuanzia sekta ya afya, elimu, maji, mazingira, miundombinu ya barabara, nishati ya umeme na mengineyo.

Mbali ya kazi hiyo kubwa anayoifanya ni meya wa kwanza mwanamke kushika wadhifa huo katika manispaa ya Singida na amekuwa kiunganishi kikubwa cha wanawake wa Mkoa wa Singida kwa kuwahimiza kujiunga kwenye vikundi ili waweze kupata mikopo kwenye taasisi za fedha na kuanzisha shughuli za ujasiriamali ili kujiinua kiuchumi.

Aidha, amekuwa akiwahimiza wanawake wa manispaa hiyo kujitokeza kugombea nafasi za uongozi katika uchaguzi wa Serikali za Mitaa utakaofanyika mwishoni mwa mwaka huu na uchaguzi mkuu wa madiwani, wabunge na rais utakaofanyika mwakani.

Kupitia nafasi yake hiyo, Kiaratu ameanzisha utaratibu mzuri wa kusimamia mapato ambapo timu ya madiwani imeundwa kwa ajili ya ufuatiliaji wa mapato lengo likiwa ni kuhakikisha mianya ya upotevu wa mapato inazibwa.

Baadhi ya mambo yaliyofanywa na Kiaratu ni ununuzi wa magari mapya ya kusomba takataka sehemu mbalimbali za Manispaa ya Singida, kushiriki shughuli za kitaifa zinazofanyika ndani ya manispaa na nje kama mikutano inayohusisha majiji, maonesho ya kilimo, mbio za Mwenge wa Uhuru nk.

Kupitia uongozi wake, Kiaratu amekuwa akitoa nafasi kwa kila diwani kuchangia bila upendeleo jambo linalowafanya madiwani  kuwa wamoja na kuiletea maendeleo Manispaa ya Singida.

Mstahiki Meya wa Manispaa ya Singida, Yagi Kiaratu (katikati) akiwa katika picha ya pamoja na Wajumbe wa Baraza la Madiwani baada ya mkutano maalum wa kupitia na kujadili Bajeti 2024/25 kuhitimishwa. Wengine katika picha hiyo ni aliyekuwa Mkuu wa Wilaya ya Singida, Mhandisi Paskas Muragili (wa pili kutoka kulia waliokaa.)

Mstahiki Meya wa Manispaa ya Singida Yagi Kiaratu akiwahutubia wanawake katika kilele cha maadhimisho ya Siku ya Wanawake Duniani kwenye Ukumbi wa RC Mission mjini Singida Machi 8, 2022.

Meya wa Manispaa ya Singida, Yagi Kiaratu akikabidhiwa keki na Kiongozi wa Mbio za Mwenge wa Uhuru Kitaifa 2024, Godfrey Eliakimu Mnzava ikiwa ni zawadi kwa wananchi wa Manispaa ya Singida kutoka kwa kiongozi huyo wakati akiaga rasmi Mwenge huo ukielekea Wilaya ya Iramba. Katikati ni Mkuu wa Wilaya ya Singida, Godwin Gondwe.

Mkurugenzi wa Manispaa ya Singida, Jeshi Lupembe akisalimiana na Mstahiki Meya wa Manispaa ya Singida, Yagi Kiaratu (katikati) Mwenyekiti wa Halmashauri ya Singida DC, Elia Digha wakiwa kwenye Maonesho ya Wakulima Nanenane, Kitaifa 2024 yaliyofanyika Viwanja vya Nzuguni, jijini Dodoma.

Mstahiki Meya wa Halmashauri ya Manispaa ya Singida, Yagi Kiaratu akiwa pamoja na Kamati ya Fedha na Utawala wa Manispaa ya Singida wakati wakizindua gari la kubebea wagonjwa (ambulance) likiwa ni moja ya magari yaliyotolewa na Serikali kwa Halmashauri mbalimbali nchini.

 

Mhershimiwa Yagi Kiaratu akijaribu kuwasha gari hilo.

Mkurugenzi wa Manispaa ya Singida, Jeshi Lupembe (wa pili kulia) akiwa katika picha ya pamoja na madereva wa manispaa hiyo mbele ya magari ya kuzolea takataka  yaliyonunuliwa na manispaa hiyo yenye thamani ya Sh. Milioni 200. Magari hayo yamepatikana kipindi hiki cha uongozi wa Mstahiki Meya Yagi Kiaratu na kuufanya mji wa Singida kuwa msafi wakati wote.