MBARONI KWA TUHUMA ZA KUMBAKA NA KUMLAWITI BIBI WA MIAKA 68

Kamanda wa Jeshi la Polisi Mkoa wa Mwanza Wilbrod Mutafungwa akitoa taarifa ya matukio mbalimbali ya kihalifu yakiwemo ya ulawiti na ubakaji kwa waandishi wa habari (hawapo pichani) 

………....................................

Na Hellen Mtereko, Mwanza

Jeshi la Polisi Mkoa wa Mwanza linamshikilia Atanas Michael Masubo mwenye umri wa miaka 65 kwa tuhuma za kumbaka na kumlawiti bibi wa miaka 68 wakati wakinywa pombe aina ya Konyagi.

Kamanda wa Polisi Mkoani Mwanza Wilbroad Mutafungwa amesema tukio hilo limetokea Novemba 07, 2024 nyumbani kwa mwanaume huyo mtaa wa Kashishi kata ya Nyamhongolo Wilaya ya Ilemela, ambapo inadaiwa bibi huyo alifika nyumbani kwa Atanas ambae ni Jirani yake na kumkuta akinywa pombe aina ya Konyagi ndipo akakaribishwa na kisha wakaanza kunywa wote pombe hiyo.

Aidha kamanda Mutafungwa amesema wakati wakiendelea kunywa pombe hiyo ndipo Atanas akamuagiza binti wa kazi dukani kununua pombe nyingine ili waendelee kunywa ambapo alitumia muda huo kumuingilia mama huyo kimwili kwa kumbaka na kumlawiti huku akimtishia kumuua kwa panga alilokuwa ameshika mkononi mwake.

“Baada ya tukio hilo mama huyo alifanikiwa kukimbia na kutoa taarifa kwa jeshi la polisi ambapo uchunguzi kuhusiana na tukio hilo ulianza mara moja na mtuhumiwa ambaye ni Atanas Masubo (65) tayari amekamatwa na kuhojiwa,uchunguzi umekamilika na jalada limepelekwa ofisi ya mashtaka kwa hatua zaidi za kisheria”, Alisema Kamanda Mutafungwa