BONDE LA KATI RASMI KUIMARISHA ULINZI ZIWA BASSOTU

Mkuu wa Wilaya ya Hanang Janeth Mayanja (katikati) na Mkurugenzi wa Bodi ya Maji Bonde la Kati, Danford Saimon na viongozi wengine wa wilaya hiyo wakikata keki maalum kuashiria ishara ya kuzindua rasmi Jumuiya Mpya mbili za watumia maji wa Bwawa la Bassotu na Bonde Dogo la Endagaw zitakazokuwa na jukumu la kusimamia, kulinda na kuhifadhi vyanzo vya maji Ziwa Bassotu na Bonde Dogo la Endagaw kwa kumujibu wa sheria.

Viongozi mbalimbali wakiwa meza kuu. Kutoka kushoto ni Mkurugenzi wa Bodi ya Maji Bonde la Kati, Danford Saimon, Mkuu wa Wilaya ya Hanang Janeth Mayanja, Katibu Tawala wa Wilaya ya Hanang, Paul Bura na Afisa Maendeleo ya Jamii Mwandamizi wa Bodi ya Maji Bonde la Kati, Nelea Bundala.

Mkuu wa Wilaya ya Hanang Janeth Mayanja akihutubia wakati wa uzinduzi wa jumuiya hizo.

Mkurugenzi wa Bodi ya Maji Bonde la Kati, Danford Saimon akizungumza katika uzinduzi huo.

Diwani wa Kata ya Bassotu ambaye pia ni Mwenyekiti wa Halmashauri ya Wilaya ya Hanang, Rose Kamili akizungumza kwenye uzinduzi huo.

Afisa Maendeleo ya Jamii Mwandamizi wa Bodi ya Maji Bonde la Kati, Nelea Bundala akitoa taarifa ya mchakato mzima wa uundwaji wa jumuiya hizo.

Katibu Tawala wa Wilaya ya Hanang, Paul Bura, akizungumza wakati wa uzinduzi wajumuiya hizo.

Wajumbe wa jumuiya hizo wakiwa kwenye hafla hiyo.

Hafla ikiendelea.

Viongozi mbalimbali wakiwepo wa dini wakiwa kwenye hafla hiyo.

Muonekano wa keki maalum iliyoandaliwa kwa ajili ya uzinduzi wa jumuiyahizo.

Mgeni rasmi Mkuu wa Wilayaya Hanang, Janeth Mayanja akiwa katika picha ya pamoja na wakina mama pamoja na kikundi cha sanaa cha wanawake walioimba wimbo maalum wa uzinduzi wa vyanzo hivyo vipya vya maji.

Godwin Myovela na Dotto Mwaibale, Manyara

WIZARA ya maji kupitia Bodi ya Maji Bonde la Kati imezindua jumuiya mpya mbili za watumia maji zitakazokuwa na jukumu la kusimamia kisheria na kutunza rasilimali za vyanzo vya maji vya Ziwa Bassotu na Bonde dogo la Endagaw vilivyopo wilaya ya Hanang mkoani Manyara

Ongezeko la jumuiya hizo inafanya jumla ya jumuiya zote za watumia maji zilizoundwa na bonde hilo kuzunguka Halmashauri zipatazo 40, wilaya 32 ndani ya mikoa 8 nchini kufikia 9 mpaka sasa.

Akizungumza kwenye hafla ya uzinduzi huo hivi karibuni, Mkuu wa Wilaya ya Hanang Janeth Mayanja alipongeza hatua ya uanzishwaji wa jumuiya hizo na kusisitiza pamoja na mambo mengine zitakuwa msaada mkubwa kwa usimamizi wa uhifadhi endelevu wa vyanzo vya maji vilivyopo kwa manufaa ya wana-Hanang

Aidha, Mayanja alishauri wataalamu wa bonde la kati kufanya tathmini ya kubaini vyanzo vingine vipya vya maji kuzunguka wilaya hiyo, kikiwemo chanzo cha Endasaki na kuanza kuchukua hatua za mapema za uhifadhi wake, ili kwa pamoja visaidie kutosheleza mahitaji ya maji ndani ya wilaya hiyo kwa vizazi vya sasa na baadaye

Hata hivyo aliwasihi wanajumuiya wapya na viongozi waliochaguliwa kuhakikisha wanatekeleza majukumu yao kwa weledi na kwa kushikamana, ikizingatiwa kuanzia sasa kazi za usimamizi wa rasilimali za maji watakazozifanya zipo kisheria.

“Fanyeni kazi zenu kwa kushikamana na pale mtakapokwamishwa na yeyote msisite kuomba ushirikiano kutoka kwenye mamlaka nyingine zilizopo, ikiwemo ofisi yangu na ya Kamanda wa Polisi wa Wilaya ili kwa pamoja tuweze kuvinusuru vyanzo vyetu vya maji vilivyopo,” alisema Mayanja.

Kwa upande wake Mkurugenzi wa Bodi ya Maji ya bonde hilo, Danford Samson alisema bonde la kati litaendelea kuanzisha zaidi jumuiya nyingine kwa mujibu wa sheria lengo ni kuhakikisha ulinzi wa rasilimali za maji na utunzaji wa vyanzo vyote kuzunguka wilaya hiyo unakuwa endelevu.

“Ni jukumu letu sote kuvilinda, kuvitunza na kuvihifadhi vyanzo vyetu vya maji vilivyopo ili viwe endelevu na vya kutosheleza kwa sisi watumiaji wa leo na watakaozaliwa baadaye. Ikumbukwe binadamu tunaongezeka kila siku lakini vyanzo ni vile vile haviongezeki, na vingine vimekauka kutokana na uvamizi wa shughuli za kibinadamu na mabadiliko ya tabianchi,” alisema mkurugenzi huyo wa bonde la kati.

Awali, akitoa shukrani kwa niaba ya wananchi wa Hanang’ Mwenyekiti wa Halmashauri hiyo na Diwani wa Kata ya Bassotu Rose Kamili, alisema wananchi wa wilaya hiyo hususani wakazi waishio jirani na vyanzo hivyo, kwa moyo mkunjufu wameukubali mpango mzima wa usimamizi na uhifadhi wa kisheria wa vyanzo hivyo, chini ya jumuiya zilizoundwa na wako tayari kutoa ushirikiano wote kuhakikisha rasilimali za maji kwenye maeneo hayo zinalindwa na kuhifadhiwa.