RC SINGIDA AIPA KONGOLE TARURA UJENZI MIUNDOMBINU BARABARA

Mkuu wa Mkoa wa Singida Peter Serukamba (katikati) akikagua ujenzi wa daraja la Mwanga linalojengwa wilayani Mkalama.

..............................................

Na Dotto Mwaibale, Singida

MKUU wa Mkoa wa Singida Peter Serukamba ameridhishwa na utekelezwaji wa ujenzi wa miundombinu ya barabara inayotekelezwa na Wakala wa Barabara za Vijijini na Mijini Tanzania (TARURA) Mkoa wa Singida.

Akikagua leo Februari 20, 2024  ujenzi wa miundombinu ya madaraja na makalavati katika Wilaya ya Iramba na Mkalama, Serukamba amepongeza ubunifu na ufanisi ambao umepelekea kufanikisha miradi hiyo kwa ustadi mkubwa.

“Rais Samia Suluhu Hassan amedhamiria kuhakikisha analeta fedha za kutosha  ili kuhakikisha miundombinu ya wana Singida inakidhi mahitaji ya ustawi wa kijamii na uchumi na masuala yote ya kimtambuka kwa maendeleo ya nchi.

Serukamba akizungumzia ujenzi wa barabara ya Meli-Walla, Ntwike ya kilometa 23 yenye thamani ya zaidi ya Sh.Milioni 669 inayojengwa Wilaya ya Iramba alisema mara itakapokamilika itasaidia kurahisisha mawasiliano ya masoko ya mazao na shughuli za uvuvi katika eneo hilo na kufika makao makuu ya wilaya hiyo.

Aidha, Serukamba alimuomba Meneja wa TARURA Mkoa wa Singida Mhandisi Ibrahimu Kibasa na timu yake kuomba maombi maalumu Serikalini ya fedha za ujenzi wa daraja la mto Ntwike ambalo barabara hiyo itapita  kwani bila ya ujenzi wa daraja hilo ujenzi wake  hutakuwa hauna maana yoyote.

Meneja wa TARURA Mkoa wa Singida, Mhandisi Ibrahimu Kibasa akizungumza katika ziara hiyo ya siku moja ya RC Serukamba alisema lengo la ujenzi wa barabara hiyo ni kupunguza umbali wa kusafiri zaidi ya kilometa 40 kutoka Shelui hadi makao makuu ya Halmashauri ya Wilaya ya Iramba kwa kupitia barabara ya kuzunguka ya Misigiri lakini kwa kutumia barabara hiyo mpya watatumia kilomita 23 tu kufika Kiomboi ambako ni makao makuu ya wilaya.

Miundombinu iliyokaguliwa na Serukamba katika ziara hiyo ni ujenzi wa barabara ya Mwanza inayojengwa wilayani Iramba ya kilometa 1.5 na Old Kiomboi.

Serukamba kesho Februari 21 anatarajia kuendelea na ziara hiyo katika Wilaya ya Ikungi na Singida.

Ujenzi wa daraja hilo ukiendelea.

Ukaguzi wa miundombinu ya barabara ukiendelea katika ziara hiyo.

Mkuu wa Mkoa wa Singida Peter Serukamba akisisitiza jambo wakati wa ziara hiyo.

Muonekano wa ujenzi wa barabara ya Meli-Walla, Ntwike ya kilometa 23 inayojengwa wilayani Iramba.

Meneja wa TARURA Mkoa wa Singida Mhandisi Ibrahimu Kibasa (kushoto) akitoa taarifa za ujenzi wa miundombinu ya barabara katika ziara hiyo.Muonekano wa moja ya kalavati lililokamilika baada ya ujenzi wake wilayani Mkalama.

Ukaguzi wa daraja la la Iguguno, Kikhonda, Kinampundu na Ilunda ukifanyika.