TARURA SINGIDA WAMPONGEZA RAIS SAMIA KWA FEDHA NYINGI ALIZOTOA UJENZI WA BARABARA

Mkuu wa Mkoa wa Singida Peter Serukamba (kushoto) akielekeza jambo wakati wa ukaguzi wa ujenzi wa daraja la Minyughe lililopo wilayani Ikungi mkoani hapa Februiari 26, 2024. Kutoka kulia ni Diwani wa Kata ya Minyughe, Nelson Kiwesi na katikati ni Meneja wa Wakala wa Barabara Vijijini na Mijini Tanzania (TARURA) Mkoa wa Singida, Mhandisi Ibrahimu Kibasa. 

......................................

Na Dotto Mwaibale, Singida

WAKALA wa Barabara Vijijini na Mijini Tanzania (TARURA) Mkoa wa Singida wamemshukuru Rais Samia Suluhu Hassan kwa kutoa fedha nyingi kwa ajili ya ujenzi wa miundombinu ya barabara ukiwemo ujenzi wa daraja la Kata ya Minyughe ambao ujenzi wake utagharimu jumla ya Sh.Bilioni 2.

Daraja hilo mara baada ya kukamilika linakwenda kuwanufaisha wananchi zaidi ya 20,000 wa kata za Minyughe na Makilawa wilayani Ikungi ambao kwa  muda mrefu sasa wamekosa mawasiliano ya uhakika kutokana na kukatika kwa daraja hilo.

Meneja wa Wakala wa Barabara Vijijini na Mijini Tanzania (TARURA) Mkoa wa Singida, Mhandisi Ibrahimu Kibasa alisema kuna kila sababu ya kumshukuru Rais Samia kwa kutoa fedha nyingi kwa ajili ya ujenzi wa daraja hilo ambalo ni muhimu sana kwa wananchi wa kata hizo.

“Ebu tuangalie  gharama za ujenzi wa daraja hili ni zaidi ya  Sh.bilioni 2 ambalo litahudumia kata mbili tu pesa kama hizi tulizoea kuona zinatumika kujenga madaraja ya kuunganisha wilaya moja hadi nyingine au mkoa kwa mkoa lakini rais wetu Samia Suluhu Hassan ili kuharakisha maendeleo ya nchi kila kona ameona atoa fedha hizo tunamshukru,” alisema.

Mhandisi Kibasa akitoa taarifa kwa Mkuu wa Mkoa wa Singida Peter Serukamba kuhusu ujenzi wa daraja hilo kuwa daraja hilo alisema ujenzi wake umefikia asilimia 60 na linatakiwa kukamilika Mei 18, 2024.

Alisema hadi sasa kazi zilizofanyika ni kutengeneza njia ya mchepuko,kupanga mawe na kusuka nondo,kumwaga zege la chini na la juu na ulindaji wa daraja kwa kutumia mawe ambapo mkandarasi wa kampuni ya JP Traders Ltd aliyepewa kazi ya kulijenga kwa gharama ya Sh.Milioni 556.140, ameshalipwa Sh.milioni 224.770 sawa na asilimia 40.4 ya thamani ya mkataba wote.

Kibasa akitoa mchanganuo alisema gharama za kununua vyuma vitakavyowekwa juu ya daraja hilo vinagharimu Sh.Milioni 939 hivyo jumla ya mradi ni Sh.bilioni 1.4 ambao zikijumlishwa gharama za kodi bandarini na usafirishaji kutoka Dar es Salaam hadi kufika Singida gharama zote za mradi zitafikia jumla ya Sh.bilioni 2 au pungufu kidogo.

Kibasa alisema daraja hilo litakapokamilika zitajengwa  barabara za kiwango cha changarawe kutoka  Mtamaa-Minyughe hadi Mtavira ambapo katika mwaka wa fedha wa 2024/2025 unaoanza Julai mwaka huu zimetengwa Sh.milioni 360.

Mkuu wa Mkoa wa Singida, Serukamba akizungumza baada ya kukagua ujenzi wa daraja hilo alisema daraja hilo litakuwa halina umuhimu wa kujengwa kama wananchi watakuwa wakifanya kilimo kisicho na tija  cha kulima ekari moja na kupata magunia matatu.

Alisema tija ya daraja hilo itapatikana kwa wananchi kulima kilimo cha kuzingatia mbolea kama wanavyo elekeza wataalamu ambapo kwa ekari moja kutoa mahindi kuanzia magunia 30 hadi 35.

Serukamba aliiagiza TARURA kuhakikisha miradi hiyo inatekelezwa kwa ufanisi mkubwa na kwa wakati ili wananchi waanze kunufaika nayo.

Kwa upande wake Diwani wa Kata ya Minyughe, Nelson Kiwesi, aliishukru serikali kwa hatua iliyoichukua ya kujenga daraja hilo ambalo ni muhimu sana kwa uchumi wa wananchi wa kata hizo na kwamba kukamilika kwa ujenzi wake itakuwa ni mkombozi mkubwa kwao.

Miradi mingine iliyotembelewa Februari 27, 2024 na kukaguliwa Mkuu wa Mkoa wa Singida Peter Serukamba katika Wilaya ya Manyoni na Itigi ni wa barabara ya Iseke, Kipanduka ya kilometa tatu ambayo ipo wilayani Manyoni na inaunganisha kata tisa za Mkwese, Solya, Makuru, Chikuyu, Isajila, Sasilo, Iseke na Kintinku inayojengwa na Mkandarasi JP Traders kwa thamani ya Sh.Milioni 900.8.

Barabara nyingine iliyokaguliwa ni ya Hospitali inayejengwa kwa lami nyepesi yenye urefu wa mita 450,  Kipondoda, Tambukareli mita 3.10 mradi ambao unaunganisha Kata ya Manyoni mjini, Mhalala na Mkwese.

Mradi mwingine uliokaguliwa ni wa Halmashauri ya Wilaya ya Itigi ambao ni barabara ya kiwango cha lami kutoka Msikitini wenye thamani ya Sh.Milioni 474.72.

 Mkuu wa Mkoa wa Singida Peter Serukamba (kushoto) na Meneja wa Wakala wa Barabara Vijijini na Mijini Tanzania (TARURA) Mkoa wa Singida, Mhandisi Ibrahimu Kibasa wakioneshana kitu wakati wa ukaguzi wa ujenzi wa daraja la Minyughe lililopo wilayani Ikungi mkoani hapa Februiari 26, 2024.

Muonekano wa ujenzi wa daraja hilo.

 Mkuu wa Mkoa wa Singida Peter Serukamba akikagua ujenzi wa Barabara ya Hospitali iliyopo mjini Manyoni inayejengwa kwa kiwango cha lami nyepesi.

 Mkuu wa Mkoa wa Singida Peter Serukamba, akipokea taarifa ya ujenzi wa barabara hiyo ya Hospitali.

 Mkuu wa Mkoa wa Singida Peter Serukamba, akizungumza wakati wa ukaguzi wa Barabara ya Msikitini inayojengwa kwa kiwango cha lami mjini Itigi. Kulia ni Meneja wa TARURA Wilaya ya Manyoni Mhandisi Stephen Nyanda na katikati ni  Meneja wa Wakala wa Barabara Vijijini na Mijini Tanzania (TARURA) Mkoa wa Singida, Mhandisi Ibrahimu Kibasa.

Muonekano wa Barabara ya Msikitini inayojengwa wilayani Itgi.