TAKUKURU SINGIDA YAWANOA WANAFUNZI VYUO VIKUU KUHUSU RUSHWA, DAWA ZA KULEVYA

Kaimu Mkuu wa Taasisi ya Kuzuia na Kupambana na Rushwa Tanzania ( TAKUKURU) Mkoa wa Singida, Bi. Sipha Mwanjala akizungumza Aprili 6, 2024 na wanafunzi wa vyuo vikuu katika kongamano lililoandaliwa na Taasisi hiyo mkoani hapa lililohusu rushwa na dawa za kulevya. Kushoto ni Mratibu wa TAKUKURU na SKAUTI (TAKUSKA) Mkoa wa Singida Bi. Fatma Nkumbi na kulia ni Afisa Vijana Mkoa wa Singida, Frederick Ndahani.

............................

Na Dotto Mwaibale, Singida

TAASISI ya Kuzuia na Kupambana na Rushwa Tanzania (TAKUKURU) Mkoa wa Singida imewataka Wanafunzi wa vyuo vikuu mkoani hapa kujiepusha na matumizi ya dawa za kulevya na rushwa kwani vinawaharibu vijana ambao ndio hazina ya nchi.

Wito huo umetolewa na Mkuu wa TAKUKURU Mkoa wa Singida Bi Sipha Mwanjala wakati akizungumza na wanafunzi hao katika kongamano lililoandaliwa na Taasisi hiyo mkoani hapa lililohusu rushwa na dawa za kulevya.

Alisema lengo la kongamano hilo kwa kundi hilo la vijana ni kuwaongeza uelewa wa mapambano dhidi ya rushwa na dawa za kulevya kwani ndilo wapo katika hatari zaidi ya kuathiriwa na vitendo hivyo.

“Mafunzo haya yatasaidia mapambano dhidi ya rushwa kwa wanafunzi hawa kutoka vyuo vikuu vilivyopo mkoani kwetu hapa ambavyo ni Chuo cha Maji, Afya, Utumishi na Taasisi ya Uhasibu Tanzania (TIA) Kampasi ya Singida na kuleta matokeo chanya,” alisema Bi. Mwanjala.

Alisema Takukuru imeamua kuwashirikisha vijana katika kongamano hilo kwa sababu inatambua vijana kuwa ni mtaji usiofilisika na ni hazina ya taifa kwa maana kwamba vijana wakipata elimu ya masuala ya rushwa watasaidia katika kuzuia na kupambana na rushwa kwa kutoa taarifa TAKUKURU pia kuwa mabalozi wazuri kwa wenzao ambao hawakupata fursa ya kupata elimu hiyo.

Bi. Mwanjala alisema kuwa vijana ni kizazi na wazazi wa kesho hivyo wakijua umuhimu wa maadili na kuepukana na vitendo vya rushwa TAKUKURU inaamini kwamba watawafundisha watoto wao kufuata sheria na kanuni na taratibu na kuepukana na masuala ya rushwa wakiamini kwamba rushwa na maadili ni sawa na pande mbili za shilingi.

Alisema kunapokuwa na rushwa hakuna maadili na kukiwa na maadili hakuna rushwa na kueleza kuwa hivi sasa vijana wapo chuoni na kesho kutwa wao ndio watakuwa maofisini hivyo wakielimishwa na kutambua maadili watafanya kazi kwa kuzingatia sheria na taratibu na watatenda haki na wananchi watapata huduma stahiki hivyo vitendo vya rushwa vitapungua kama sio kumalizika kabisa.

Mratibu wa TAKUKURU na SKAUTI (TAKUSKA) Mkoa wa Singida Bi. Fatma Nkumbi alisema wao kama wadau wa Takuska ni muhimu kuwapa elimu vijana kwa sababu kundi hilo ni taifa la leo na kesho na kuwa taifa ambalo vijana wake wanatumia dawa za kulevya nguvu kazi itapungua na uchumi wa taifa utadorora.

Alisema kutokana na kuwepo kwa vitendo vya rushwa na matumizi ya dawa za kulevya kundi hilo likipata elimu linaweza kutokomeza mambo hayo kutokana na uwezo mkubwa walionao vijana.

“ Sisi kama wadau wa TAKUSKA tumepanga mikakati pamoja na TAKUKURU kupita kila maeneo ya vijijini pamoja na mijini, mashuleni na maeneo yenye mikusanyikao ya watu kuwapa elimu wakiwemo vijana na warika la kati, wanafunzi wa shule za msingi na vyuo na wale ambao wanaendesha maisha yao sehemu mbalimbali,” alisema Bi. Nkumbi.

Kwa upande wake, Afisa Vijana Mkoa wa Singida, Frederick Ndahani aliwataka vijana kuwa wazalendo na kuacha kuwa na tamaa ya kuwa na maisha mazuri na kueleza kwamba tamaa hizo ndio kichocheo kikubwa cha wao kujiingiza katika vitendo vya rushwa na dawa za kulevya.

Latifa Hussein Mwanafunzi wa Taasisi ya Uhasibu Tanzania (TIA) Kampasi ya Singida akizungumza kwa niaba ya wanafunzi wenzake aliishukuru TAKUKURU kwa kuwapa elimu hiyo ambayo imewaongezea uelewa wa mambo mengi ya mapambano dhidi ya vitendo vya rushwa na dawa za kulevya.Mtumishi wa Takukuru Mkoa wa Singida, Dorothea Kinyonto akizungumzia madhara ya vitendo vya rushwa.Mtumishi wa Takukuru Mkoa wa Singida, Joseph John, akizungumza na wanafunzi wa vyuo vikuu vya Mkoa wa Singida.