MKURUGENZI SINGIDA ASHIRIKI KIKAO CHA MADIWANI KWA MARA YA KWANZA, AMTAJA RAIS SAMIA

Mstahiki Meya wa Halmashauri ya Manispaa ya Singida, Yagi Kiaratu akiongoza kikao cha cha kwanza cha robo ya nne cha baraza la madiwani kilichoketi kupitia taarifa za utekelezaji wa shughuli mbalimbali zilizofanyika kwenye kata katika kipindi cha 2023/ 2024 kilichofanyika Septemba 10, 2024.

............................................

( Imeandaliwa na Dotto Mwaibale / Philemon Solomoni )

0754-362990

MKURUGENZI wa Halmashauri ya Manispaa ya Singida, Joanfaith Kataraia ameshiriki baraza la madiwani la manispaa hiyo kwa mara ya kwanza tangu amehamishiwa Singida ambapo ametumia nafasi hiyo kujitambulisha na kuomba kupewa ushirikiano katika utendaji wa kazi.

Kataraia aliomba ushirikiano huo katika kikao hicho cha kwanza cha robo ya nne cha baraza la madiwani kilichoketi kwa ajili ya kupitia taarifa za utekelezaji wa shughuli mbalimbali zilizofanyika kwenye kata katika kipindi cha 2023/ 2024 kilichofanyika ukumbi wa mikutano wa Chuo cha Mafunzo ya Ufundi Stadi (VETA)

“Kwanza kabisa napenda nijitambulishe kwenu likiwa baraza la kwanza kushiriki nikiwa Mkurugenzi wa Manispaa ya Singida waheshimiwa wajumbe naitwa Joanfaith John Kataraia ndio Mkurugenzi wa Halmashauri ya Manispaa ya Singida ninapenda kumshukuru Mwenyezi Mungu kwa kunipa kibali cha kuijenga na kuiendeleza Manispaa yetu ya Singida,” alisema Kataraia.

Pia Kataraia alitumia nafasi hiyo kumshukuru sana Rais Dkt. Samia Suluhu Hassan kwa kumuamini na kuendelea kutumika katika nafasi ya ukurugenzi.

“Mheshimiwa mwenyekiti wa kikao hiki Mstahiki Meya napenda kukushukuru pamoja na watumishi wote wa Manispaa ya Singida kwa mapokezi makubwa mlionifanyia na ushirikiano mlionipa naomba muuendeleze ili tuweze kuitengeneza Manispaa yetu vizuri,” alisema Kataraia.

Akizungumza katika kikao hicho, Mstahiki Meya wa Manispaa hiyo Yagi Kiaratu alitoa angalizo kwa watendaji hao kwa kuwaambia kuwa kila ngoma inachezwa kwa midundo yake hivyo waachane na midundo iliyopita na kuanza milio mipya ‘tune’ ili Kataraia asije akawaona ni watu wa tofauti kwa kuwa wanacheza midundo ya zamani ambapo aliwaomba watendaji hao kwenda na kasi ya utendaji wa kazi wa mkurugenzi huyo.

Kiaratu naye kwa nafasi yake aliwaomba madiwani na watumishi wa Manispaa ya Singida kumheshimu, kumsikiliza na kumpa ushirikiano wa kutosha ili Manispaa ya Singida iendelee kupaa kimaendeleo.

Mwenyekiti wa Chama Cha Mapinduzi (CCM), Wilaya ya Singida, Lusia Mwiru alimueleza Kataraia kuwa wilaya hiyo inaongozwa na madiwani wote 18 wanaotokana na CCM wakiwemo na wa viti maalumu pamoja na wabunge.

“Hivyo ujue sisi hapa tunaimba wimbo mmoja pia nataka kukuambia kwamba tunaushirikiano mzuri sana baina ya Serikali na CCM hususani ofisi yako na hawa watendaji unaowaona hapa tunaimba wimbo mmoja na sisi tunaamini na wewe utakuwa mwenzetu,” alisema Mwiru.

Mwenyekiti huyo alisema alibahatika kuwa mmoja wa wenyeviti wa chama hicho waliokwenda Kibaha Mkoa wa Pwani kwa ajili ya mafunzo ambako alikutana na baadhi ya wenyeviti wa chama hicho wa Mkoa wa Morogoro akiwepo Katibu wa Mkoa ambao walimueleza Kataraia kuwa ni mchapa kazi mzuri na Manispaa ya Singida imebahatika hivyo wana kila sababu ya kumshukuru Rais Samia kwa kumuamini na kumuhamishia Singiga.

TAZAMA VIDEO HAPA

Mkurugenzi wa Halmashauri ya Manispaa ya Singida, Joanfaith Kataraiia akizungumza kwenye kikao hicho.

Mwenyekiti wa Chama Cha Mapinduzi (CCM), Wilaya ya Singida, Lusia Mwiru akitoa salamu za chama katika kikao hicho..

Mstahiki Meya wa Halmashauri ya Manispaa ya Singida, Yagi Kiaratu akiteta jambo na Mkurugenzi wa Manispaa hiyo, Joanfaith Kataraia wakati wa kikao hicho.