NSSF SINGIDA YAPEWA ELIMU YA DAMU SALAMA, YAWATUNUKU VYETI WANACHAMA WAO

Meneja wa NSSF Mkoa wa Singida, Oscar Kalimilwa akizungumza wakati wa kuhitimisha maadhimisho ya wiki ya huduma kwa wateja Oktoba 10, 2025.

...................................

Na Waandishi Wetu

SHIRIKA la Taifa la Hifadhi ya Jamii (NSSF) Mkoa wa Singida limehitimisha Maadhimisho ya wiki ya huduma kwa wateja kwa kupata elimu ya damu salama kutoka kwa wataalam wa Hospitali ya Rufaa ya Mkoa wa Singida ya Mandewa.

Mtaalam wa Damu Salama kutoka hospitali hiyo, Anyelwisye Philimoni akizungumza wakati wa utoaji elimu hiyo alisema uchangiaji wa damu siyo vita bali inasaidia kuokoa maisha ya watu.

Alisema uchangiaji wa damu hauna madhara yoyote hivyo amewatoa watu waliokuwa na wasiwasi wa kuchangia na kuwataka kujitokeza kuchangia.

“ Mahitaji ya damu katika hospitali zetu ni makubwa mno hivyo inahitajika kwa wingi ili kupunguza changamoto ya upungufu katika Hospitali zetu ya Rufaa, Mkoa na Makiungu,” alisema Philimoni.

Alisema mahitaji hayo yamekuwa yakiongezeka kila siku na kuwa huduma hiyo wamekuwa wakiitoa katika hospitali mbalimbali za binafsi na Serikali na ndiyo maana Serikali imekuwa ikifanya jitihada za kupatikana kwake kwa kuunda timu ya kuitafuta.

Meneja wa NSSF Mkoa wa Singida, Oscar Kalimilwa akizungumza wakati wa kuhitimisha maadhimisho hayo alisema kwao ni siku muhimu sana kwa kuwakumbuka wanachama wao na kushirikiana nao kwani bila yao wao wasingekuwepo.

Alisema kuwa hivi sasa shirika hilo limepiga hatua kubwa kwani huduma zao zote zinapatikana mkononi kama ilivyo kauli mbiu yao ya mwaka huu isemayo ‘Kidijitali Tumeweza, kwani mwanachama anaweza kufungua madai mwenyewe na mwajiri anaweza kulipa kupitia mfumo huo wa kidijitali.

“Mwanachama anaweza kuona michango yake mwenyewe bila ya kufika kwenye ofisi yetu hii ni hatua kubwa kama shirika tuliyoifikia,” alisema Kalimilwa.

Akizungumza kwa niaba ya waajiri Fr. Constantine Missanga kutoka Hospitali ya Makiungu aliishukuru NSSF kwa ushirikiano ambao imekuwa ikiwapa na kutambua mchango wao wa kuwachangia wafanyakazi wao.

Katika maadhimisho hayo NSSF Mkoa wa Singida imezitambua taasisi na waajiri wanaojitolea kwa hali na mali kuhakikisha michango ya wanachama wake inawasilishwa kwa wakati na kuwatunuku vyeti maalum wakiwemo watu binafsi ambao ni wanachama wao.

Mtaalam wa Damu Salama kutoka Hospitali ya Rufaa ya Mkoa wa Singida ya Mandewa. Anyelwisye Philemoni Kyamba akitoa elimu ya damu salama kwa wafanyakazi wa NSSF Mkoa wa Singida.