MAZIKO YA MWALIMU ALIYETESEKA KWA KISUKARI MIAKA 17 KUFANYIKA MUSOMA, AAGWA DODOMA

Ni Mwalimu Helena Nyahuru Mahamba

Waombolezaji wakiwa wamebeba jeneza lenye mwili wa Marehemu Mwalimu Helena Nyahuru Mahamba (42), wakati wa ibada yake ya kumuaga iliyofanyika leo Machi 29, 2026 nyumbani kwao Nkuhungu Chama Jijini Dodoma.

Mwalimu Helena Mahamba enzi zake kabla ya kuanza kuumwa.

Mwalimu Helena Mahamba alivyokuwa wakati anapigania uhai wake.

...........................

MAZIKO ya Mwalimu Helena Mahamba (42) wa Shule ya Msingi Unyakhae katika Manispaa ya Singida ambaye alikuwa akisumbuliwa na ugonjwa wa kisukari kwa miaka 17 na kufariki Hospitali ya Benjamin Mkapa Jijini Dodoma alipokuwa akipatiwa matibabu kufanyika nyumbani kwao mkoani Mara.

Mwili wa marehemu Mahamba umeagwa leo Machi 29, 2026 nyumbani kwao Nkuhungu jijini Dodoma ambapo ilifanyika ibada fupi iliyoongozwa na Katekista wa Kanisa Katoliki Parokia ya Nkuhungu, Rafael Mlingula akishirikiana Joseph Ghumpi.

Ibada hiyo ilihudhuriwa na ndugu, jamaa, marafiki wakiwepo maafisa wa Jeshi la Magereza wakiongozwa na Kamishna Msaidizi wa jeshi hilo (ACP) Lumumba Kashura kwa niaba ya Kamishna Generali wa jeshi hilo, ambao walifika kumfariji mwenzao Sajenti Waero Thong’ro kwa kufiwa na mke wake Helena Mahamba.

Katekista Rafael akihubiri katika ibada hiyo alisema kila mtu anapaswa kujitafakari kwanini yupo hapa duniani na baada ya kifo atakwenda wapi na kueleza kuwa Mungu yupo na wanadamu katika maisha yao ya kila siku.

“Mungu amekuwa akitukumbusha wakati wote kutenda mema na kuwaombea ndugu zetu waliofariki kama Helena Mahamba ili wapate uzima wa milele,” alisema Mlingula.

Mwalimu Philipina Mboya akizungumza kwa niaba ya Mwajiri wa Helena Mahamba, alisema wamesikitika sana kwa kifo chake na kuwa ameumwa kwa muda mrefu.

“Helena ni Mwalimu wetu, tunasikitika sana kwa kifo chake ukweli ameugua muda mrefu na sisi kama walimu wenzake na mwajiri wake tumeweza kushirikiana naye kuhakikisha anapata matibabu na mara ya mwisho aliomba tumpeleke Hospitali ya Benjamin Mkapa ili aweze kuwa karibu na baba yake mzazi katika kumuuguza,” alisema Mboya.

Mboya aliongeza kuwa Mwajiri wake Helena yupo na familia hiyo bega kwa bega na kuhakikisha mwili wake unasafirishwa kutoka Dodoma hadi nyumbani kwao mkoani Mara na kuwa salamu zao za rambirambi watazitoa kesho mkoani Singida watakapokuwa wakiuaga rasmi mwili wake.

Kwa mujibu wa Mama wa Marehemu Helena, Regina Muhere (Mahamba), alisema mwili huo unaondoka leo Machi 29,2026 kwenda nyumbani kwake Singida.

Alisema kesho (Jumatatu) Machi 30, 2026 ndugu, jamaa, majirani na walimu wenzake watatoa heshima za mwisho na kisha kuelekea mkoani Mara na Machi 31, 2026 maziko yake yatafanyika Kijiji cha Sota Shirati.

Mahamba ambaye alikuwa amelazwa katika hosptali hiyo alifariki Machi 28, 2026 saa 9 usiku.

Mwalimu Mahamba baada ya kushindwa kumudu gharama za matibabu alilazimika kubaki nyumbani akijiuguza huku hali yake ikiendelea kudhoofu kila siku.

Taarifa zake zilipotolewa kwenye mitandao ya kijamii akiomba msaada wa matibabu na kwa jitihada za Naibu Waziri wa Afya Dkt. Florence Samizi alipoisoma taarifa hiyo aliagiza mgojwa huyo apelekwe Hospitali ya Rufaa ya Mkoa wa Singida kuanza matibabu upya.

Pamoja na kuanza matibabu hali yake iliendelea kuwa mbaya na Machi 14, alipata rufaa ya kuhamishiwa Hospitali ya Benjamin Mkapa jijini Dodoma kwa ajili ya kuendelea kupata matibabu.

Mwalimu Mahamba wakati akipigania uhai wake akiwa nyumbani kwake eneo la Unyakhae alidai kuwa tangu alipokuwa anaumwa katika kipindi cha miaka 17 Chama cha Walimu Tanzania (CWT) Manispaa ya Singida kama mwana chama wao kilimpatia Sh. 100,000 tu huku mwajiri wake naye akidaiwa kushindwa kumsaidia.

Baadhi ya viongozi wa chama hicho wakielezea suala hilo walisema katika katiba yao hakuna kipengele ambacho kinaeleza mwanachama wao anapokuwa na changamoto yoyote ikiwemo kuumwa apatiwe msaada na kama atapatiwa ni msaada tu wa vitu vidogo vidogo kama matunda ambavyo atapatiwa kama hisani.

Kauli hiyo iliwaibua baadhi ya walimu na kuomba katika katiba yao kuwepo kipengele cha kuwasaidia walimu wanapo kuwa na changamoto mbalimbali ikiwemo ya magonjwa kutokana na michango yao wanayoichangia kila mwezi.

Mmoja wa Walimu hao Robert Mtinga alisema katika Manispaa ya Singida wapo zaidi ya waimu 800 na kila mwezi kila mmoja hukatwa siyo chini ya Sh. 33,000 na wale ambao wapo daraja la juu hukatwa zaidi ya kiwango hicho na kueleza kuwa ni fedha nyingi zinazokusanywa.

Aliongeza kueleza kuwa yakipigwa mahesabu ni fedha nyingi ambazo zinapatikana katika manispaa ambapo wanaomba ziwe zinatumika kuwasaidia wanapokuwa na changamoto badala ya kusubiri kusaidiwa jeneza na kusafirishwa kwenda makwao wakifariki.

Kwa upande wake Mwalimu Helman Magoti alisema ni vema kuipitia katiba yao vizuri ili kuielewa kama hakuna kipengele cha kutambuliwa wanapokuwa na changamoto ya maradhi ili wapiganie kiwekwe kwa maslahi mapana ya walimu.

Mwalimu Helena Mahamba ameacha watoto wawili wa kike na wakiume.

Buriani Mwalimu Helena Mahamba mwendo umeumaliza kapumzike kwa amani huku ukiwaachia walimu wenzako changamoto za kupigania haki na maslahi yao kwa mwajiri na CWT.

Bwana Alitoa na Bwana Ametwaa jina lake Lihimidiwe Milele Daima.

Taarifa hii imeandikwa na Dotto Mwaibale simu namba 0754362990.

Katekista wa Kanisa Katoliki Parokia ya Nkuhungu, Rafael Mlingula, akiombea mwili wa Marehemu Helena Mahamba nyumbani kwao Nkuhungu Chama Jijini Dodoma.

Mwakilishi wa Mkurugenzi wa Manispaa ya Singida, Mwalimu Mwalimu Philipina Mboya akizungumza kwenye ibada hiyo.

Kamishna Msaidizi wa Jeshi la Magereza (ACP), Lumumba Kashura, akizungumza kwa niaba ya Kamishna Jenerali wa Jeshi la Magereza nchini (CGA), Jeremiah Katungu wakati akitoa salamu za rambirambi kwenye ibada hiyo.

Gari la Magereza lililobeba mwili wa marehemu Helena Mahamba likiwasili nyumbani kwao Nkuhungu Chama jijini Dodoma kwa ajili ya kuugwa na baadaye kusafirishwa kwenda kwao mkoani Mara kwa maziko.