𝐗 𝐘𝐀𝐊𝐀𝐁𝐈𝐃𝐇𝐈 𝐓𝐙𝐒 𝐌𝐈𝐋𝐈𝐎𝐍𝐈 𝟏𝟕𝟓 𝐊𝐖𝐀 𝐙𝐒𝐓𝐂 𝐊𝐔𝐈𝐌𝐀𝐑𝐈𝐒𝐇𝐀 𝐀𝐅𝐘𝐀

Pemba, Zanzibar | 30.04.2026. Kampuni ya huduma za fedha kidigitali, Mixx, imeendelea kudhihirisha dhamira yake ya kuimarisha uchumi wa wakulima wa karafuu Zanzibar kwa kukabidhi hundi mbili zenye jumla ya shilingi milioni 175 kwa Shirika la Taifa la Biashara Zanzibar (ZSTC).

Akizungumza katika hafla hiyo, Mkuu wa Wilaya ya Mkoani-Pemba, Mhe. Mizza Hassan Faki alisema hatua hiyo ni sehemu ya juhudi endelevu za kampuni katika kuboresha maisha ya wakulima na kuleta mapinduzi katika sekta ya kilimo kupitia suluhisho za kifedha za kidigitali.

Katika makabidhiano hayo, Mixx ilikabidhi hundi ya shilingi milioni 150 kwa ajili ya kugharamia bima ya afya kwa wakulima wa zao la karafuu, hatua inayokamilisha ahadi ya jumla ya shilingi milioni 350 kutoka Mixx kwenda ZSTC.

Aidha, hundi nyingine ya shilingi milioni 25 ilitolewa kwa ajili ya ununuzi wa miche 25,000 ya karafuu, ikiwa ni mkakati wa kuendeleza zao hilo muhimu kwa uchumi wa Zanzibar na Tanzania kwa ujumla.

Vilevile, hafla hiyo ilishuhudia zoezi la upandaji wa miche ya karafuu, ikiwa ni ishara na dhamira ya pamoja katika kukuza na kulinda zao hilo.

Akielezea umuhimu wa ushirikiano huo, Afisa Mtendaji Mkuu wa Mixx, Bi. Angelica Pesha alisisitiza kuwa ushirikiano wa kimkakati kati ya Mixx na ZSTC umejengwa katika msingi wa kuhakikisha wakulima wanapata huduma bora za kifedha zinazowawezesha kuongeza tija na kipato chao.

Alibainisha kuwa kupitia mfumo wa malipo kidigitali wa Mixx, kumekuwa na uwazi, upungufu wa upotevu wa fedha, na kuimarika kwa imani ya wakulima kwa taasisi zinazosimamia sekta hiyo.

“Tunaamini kuwa teknolojia ya kifedha ina nafasi kubwa katika kubadilisha maisha ya wakulima. Kupitia Mixx, tumefanikisha malipo ya haraka, salama na yenye uwazi, na kuondoa changamoto za ucheleweshaji wa malipo zilizokuwepo hapo awali,” alisema.

Kwa mujibu wa takwimu zilizotolewa, katika msimu wa karafuu wa 2025/2026, Mixx kwa kushirikiana na ZSTC imefanikiwa kufanya malipo ya zaidi ya shilingi bilioni 48 kwa wakulima wa Zanzibar.

Hatua hiyo pia imechangia kuongezeka kwa ajira, ambapo zaidi ya mawakala 11,000 wamepata ajira na kushiriki katika mnyororo wa utoaji huduma za kifedha.

Aidha, Mixx ilitangaza mipango ya kuanzisha huduma ya mikopo nafuu kwa wakulima wa karafuu, inayotarajiwa kuanza kabla ya msimu wa 2026/2027, ikiwa ni sehemu ya juhudi za kuwawezesha wakulima kuwekeza zaidi katika uzalishaji.

Naye Mkurugenzi Mtendaji wa ZSTC, Ndugu Soud Said Ali, alieleza kuwa ushirikiano na Mixx umeleta mageuzi makubwa katika mfumo wa malipo kwa wakulima, na kuongeza ufanisi katika usimamizi wa zao la karafuu.

Mixx imeendelea kuahidi kushirikiana kwa karibu na Serikali ya Mapinduzi ya Zanzibar, ZSTC pamoja na wadau wengine ili kuhakikisha sekta ya karafuu inakuwa ya kisasa, yenye tija na endelevu kwa manufaa ya wakulima na uchumi wa Zanzibar kwa ujumla.