NIPO KITANDANI KWA MARADHI ZAIDI YA MIAKA 40 NAWAOMBA WATANZANIA NIPATE BIMA KUBWA NITIBIWE

Mkazi wa Utemini Manispaa ya Singida, Sanje Damiani.

.............................................................

Claudia Kayombo na Dotto Mwaibale, (Singidani Blog)

 

MKAZI wa Utemini, Manispaa ya Singida, Sanje Damiani (51), (pichani), ambaye anateseka kwa maumivu ya mifupa karibu miaka 40 sasa, anawaomba wasamalia wema popote nchini na hata nje ya nchi yakiwamo mashirika au taasisi za kidini,  kumsaidia fedha itakayogharamia BIMA kubwa ili akamilishe vipimo hospitalini ambavyo anashindwa kuvigharamia.

Sanje ambaye kwa sasa anasumbuliwa zaidi na tatizo la kukakamaa mishipa mkubwa ya shingo linalomfanya ashindwe hata kuigeuza, uvimbe shingoni na mwili kukosa nguvu, amesema ana amini akipata bima ataweza kupata matibabu ambayo yatampa nafuu itakayomwezesha kufanya kazi zitakazomwingizia kipato kuliko sasa ambapo miaka mitatu anaishi kwa kutegemea huruma ya wasamalia wema.

 Akizungumza na waandishi wa habari hii mjini hapa, Sanje alisema licha ya kusumbuliwa na maradhi mbalimbali tangu akiwa na umri wa miaka Tisa, yaliyopelekea baadhi ya viungo vya mikono na miguu kufa ganzi hilo halikumfanya ashindwe kujifunza ushonaji nguo uliokuwa ukimwingiza kipato tangu alipofika umri wa kuanza kujitegemea.

Akifafanua alisema ni miaka mitatu imepita tangu uvimbe ulipomwanza shingoni kwa nje baadaye akapatwa na tatizo la kukohoa mfululizo na hatimaye uvimbe huo uliingia ndani ambapo tatizo la kukakamaa mishipa ya shingo likajitokeza na kumkalisha chini.

Sanje mama wa watoto wawili ambao wote hawajaanza kujitegemea alisema alikwenda katika sehemu kadhaa za kutolea huduma za afya ikiwamo hospitali ya rufaa ya mkoa Singida na Benjamin Mkapa Dodoma, lakini ameshibdwa kufanyiwa uchunguzi wa kina wa matatizo hayo kwa kushindwa kugharamia vipimo.

Alibainisha kuwa kwa ujumla kwa sasa anahitaji msaada wa matibabu, chakula na mahitaji mengine ya kibinadamu huku akiwashukuru baadhi ya ndugu zake ambao walimsaidia zaidi kipindi cha mwanzo wakati changamoto hizo zinamwanza.

Kwa yeyote atakayeguswa kumsaidia kwa namna yoyote, anaweza kuwasiliana naye kwa namba yake ya simu ya mkononi, 0762- 931063 au 0754362990 kwani kutoa ni moyo na  wala sio utajiri, shime msaidie mama huyu hata Sh.1000 kwake itakuwa ni kubwa na utapata baraka za Mungu..Mkazi wa Utemini Manispaa ya Singida, Sanje Damiani.akiwa na mtoto wake ambaye anamsaidia shughuli mbalimbali baada ya kutoka shuleni.