RPC SONGWE: MNAPOCHUKUA MIKOPO WASHIRIKISHENI WENZA WENU

Kamanda wa Polisi Mkoa wa Songwe Kamishna Msaidizi Mwandamizi wa Polisi (SACP ) Theopista Mallya ambaye alikuwa mgeni rami akihutubia Kongamano la Nishati Mbadala lililofanyika Vwawa Wilayani Mbozi lililoandaliwa na Taasisi isiyo ya kiserikali ya Tanzania Women Empowerment Network (TAWEN) Februari 24, 2024.

..........................................

Na Issa Mwadanga-Songwe 

WANAWAKE Mkoa wa Songwe wametakiwa kuwashirikisha wenza wao wakati wanapochukua mikopo ya Ujasiriamali ili kuepusha matokeo hasi yanayotokea kwa baadhi yao wanaposhindwa kulipa mikopo hiyo.

Hayo yalisemwa na Kamanda wa Polisi Mkoa wa Songwe Kamishna Msaidizi Mwandamizi wa Polisi (SACP ) Theopista Mallya, Februari 24, 2024  alipokuwa akifungua Kongamano la Nishati Mbadala lililofanyika Vwawa Wilayani Mbozi lililoandaliwa na Taasisi isiyo ya kiserikali Tanzania Women Empowerment Network (TAWEN) ambayo imeingia mkataba na kampuni ya usambazaji Gesi ORXY kwa lengo la kuunga juhudi za serikali kumtua mwanamke kuni kichwani.

Kamanda Mallya alisema “Kuna baadhi ya wanawake huchukua mikopo hatarishi bila kumjulisha mwenza wake ambayo mnashindwa kumudu malipo yake kitendo hicho kinapelekea kuwa na msongo wa mawazo na baadhi yao uanza kuua watoto wao kwa kuhisi  watapata shida kisha anajiua na yeye, hiyo ni mbaya wanawake wenzangu mnatakiwa kuchukua mikopo yenye tija ambayo mnaweza kumudu kuilipa ikiwa ni pamoja na kumshirikisha mwenza wako” alisema Kamanda Mallya.

Sambamba na hayo amewaasa wanawake wa mkoa huo  kutumia nishati mbadala ili kuepuka athari zitokanazo na matumizi ya nishati ya kuni.

Naye Mratibu wa Kongamano hilo kutoka TAWEN Dar Es Salaam Levina Mlokozi akizungumza katika kongamano hilo ambaye ni mwakilishi wa Mkurugezi wa TAWEN alisema kuwa lengo la kongamano hilo ni kuhakikisha mama anatuliwa kuni kichwani ili kusababisha mazingira yanatunzwa na kuwa salama.

“Tumeandaa kongamano hili kuunga juhudi za  Rais wa Jamuhuri ya Muungano wa Tanzania Dkt. Samia Suluhu Hassan ili kuwafanya wanawake wa Mkoa wa Songwe watumie nishati safi ambayo ni salama kwa afya yao” alisema Mratibu Mlokozi.

Kongamano hilo lililobeba kauli mbiu isemayo "Kumtua mama Kuni Kichwani" ambapo jumla ya mitungi ya gesi 100 ilitolewa kwa wanawake Mkoani hapa kwa lengo la kuendelea kuiweka Tanzania ya kijani.

Viongozi wakiwa meza kuu wakati wa kongamano hilo.

Mitungi ya Gas ya Kampuni ya ORYX ikiwa tayari kwa kugaiwa wanawake katika kongamano hilo.

Mitungi ya gas na majiko yake ikigaiwa wakati wa kongamano hilo.

Wanawake wa Wilaya ya Vwawa wakiwa kwenye kongamano hilo.

Taswira ya kongamano hilo.