DC GONDWE AMALIZA MGOGORO WA VIBARUA DHIDI YA RUWASA KWA MASAA MAWILI , AMTAJA RAIS SAMIA

Mkuu  wa Wilaya ya Singida, Godwin Gondwe, akizungumza na vijana ambao walilazimika kuandamana hadi ofisini kwake kudai malipo ya fedha zao walizocheleweshewa kupewa na Wakala wa Maji na Usafi wa Mazingira Vijijini (RUWASA) Wilaya ya Singida baada ya kufanya kazi ya kuchimba mtaro wakati wa utekelezaji wa mradi wa maji uliopo Kijiji cha Mwiganji.

...........................

Na Dotto Mwaibale, (Singidani Blog)

MKUU wa Wilaya ya Singida, Godwin Gondwe amefanikiwa kumaliza mgogoro kwa masaa mawili, uliokuwepo baina ya vibarua waliokuwa wakifanya kazi ya kuchimba mitaro kwenye mradi wa maji katika Kijiji cha Mwiganji dhidi ya Wakala wa Maji na Usafi wa Mazingira Vijijini (RUWASA) Wilaya ya Singida baada ya kuwacheleweshea kuwalipa fedha zao ambazo walipaswa kulipwa tangu mwezi Februari, 2024.

Licha ya kuwa ni siku ya mapumziko DC Gondwe alilazimika kwenda ofisini kuwasikiliza vibarua hao na kumaliza mgogoro huo ambao ulikuwa na mvutano mkali baada ya kuwaita wahusika wote waliokuwa wakitekeleza mradi huo kuanzia Mkandarasi, RUWASA na vibarua hao ambao walikuwa wameandamana wakiwa na mabegi yao hadi ofisi ya mkuu wa wilaya hiyo kupeleka malalamiko yao baada ya kusafiri umbali wa zaidi ya kilometa takribani 35.

"Ninyi ni vijana wazalendo mmeamua kuja kwa Rais Samia Suluhu Hassan kuleta malalamiko yenu kupitia mimi mwakilishi wake nawashukuru sana kwani mngeweza hata kuuhujumu mradi huo kwa hasira za kukosa malipo yenu. Nimesikiliza maelezo ya pande zote ninyi RUWASA ninachowaomba kama hela yao ipo muwalipe leo hii Aprili 6, 2024 na malipo hayo mkayafanye kijijini ulipotekelezwa mradi huo ili hata wale Mama Lishe na watu wengine wanaowadai vibarua hawa baada ya kupatiwa mahitaji mbalimbali nao waweze kupata fedha zao," alisema Gondwe.

Gondwe aliwataka RUWASA wanapoanza kutekeleza mradi wowote baada ya kupatikana mkandarasi kuhakikisha unakuwepo mkataba wa kazi baina ya wahusika na vibarua badala ya kufanya kazi kiholela bila ya kuwepo kwa mkataba jambo ambalo litasaidia kuondoa migogoro isiyo ya lazima wakati wa utoaji wa malipo.

Mhandisi wa RUWASA Wilaya ya Singida, Joel Kabusi akizungumza kwa niaba ya Meneja wa RUWASA wa wilaya hiyo, Mhandisi Athumani Mkalimoto alikiri kuwatambua vibarua hao na kueleza ni kweli walikuwa wakidai fedha zao baada ya kumalizika kwa kazi ya mradi huo wa maji ambao umeanza kufanya kazi.

"Malipo ya vibarua hawa yalichelewa kutolewa kwa sababu za mifumo ya kibenki kama mnavyofahamu fedha za Serikali zinataratibu zake zinavyotolewa na ilikuwa walipwe Ijumaa Aprili 5, 2024 lakini fedha hizo ziliingizwa kwenye akaunti yetu toka benki jioni hivyo kwa usalama ikawa vigumu kufanya malipo na ndipo tulipanga tuwalipe leo Jumamosi Aprili 6, 2024," alisema Mhandisi Kabusi.

Alisema kabla ya kufanyika kwa malipo hayo ndipo vibarua hao walilazimika kuja ofisi ya mkuu wa wilaya kulalamika wakati tayari walikuwa wamekwisha waeleza kuwa fedha zao zipo tayari kwa malipo na kuwa kiasi cha fedha walichokuwa wakidai ni Sh.Milioni 12.5.

Mwakilishi wa vibarua hao Joshua Msumari kutoka Mkoa wa Mara alisema walianza kufanya kazi hiyo kwa makubaliano ya kuchimba mtaro na kufukia wenye urefu wa kilometa 10 ambapo kazi hiyo waliianza rasmi februari 26, 2024 na waliimaliza Machi 18, 2024 chini ya Mkandarasi aliyemtaja kwa jina la Kajuna.

Alisema makubaliano yao ilikuwa kazi hiyo waimalize kabla ya Machi 20, 2024 ambayo waliifanya kwa uaminifu mkubwa na kuimaliza kwa wakati uliopangwa lakini kila walipokuwa wakidai madai yao tangu wakati huo walianza kupigwa danadana na kuchukua uamuzi wa kwenda kumuona mkuu wa wilaya ili awasaidie.

Msumari aliiomba Serikali kusimamia malipo baada ya kazi hizo zinazofanywa na vijana wazalendo kumalizika ili waweze kupata fedha zao kwa wakati jambo litakalosaidia kuepusha migogoro isiyo ya lazima na ambayo haina tija kama huo uliotokea.

Mkuu  wa Wilaya ya Singida, Godwin Gondwe, akimpa maelezo Mhandisi Joel  Kabusi kuhakikisha fedha hizo zinalipwa haraka kwa vibarua hao.

Mkuu  wa Wilaya ya Singida, Godwin Gondwe,akiendelea kumsisitiza Mhandisi Joel Kabusi kuhakikisha vijana hao wanalipwa fedha zao kwa muda uliopangwa na si vinginevyo.

Vijana hao wakimsikiliza Mkuu  wa Wilaya ya Singida, Godwin Gondwe (hayupo pichani wakati alipokuwa akitatua mgogoro huo dhidi ya RUWASA.

Mmoja wa vijana hao akiwa amelala katika eneo la maegesho ya magari wakati wa utatuzi wa mgogoro huo.

Baadhi ya vijana hao wakiwa katika picha ya pamoja nje ya ofisi ya mkuu wa Wilaya ya Singida baada ya kupokelewa na DC Gondwe na kuwatatulia mgogoro huo dhini ya RUWASA.