Aliyekuwa Mkurugenzi wa Manispaa ya Singida, Jeshi Lupembe akiwajibika ofisini kwake.…………………………
Na Dotto Mwaibale, Singida
JESHI Lupembe Mkurugenzi uliyekuwa wa Manispaa ya Singida sisi wana Singida tutakumisi sana kutokana na maendeleo makubwa uliyotuachia hakika umeacha alama.
Lupembe wewe ni mmoja kati ya wakurugenzi waliowahi kuiongoza Manispaa ya Singida na kusukuma mbele maendeleo ya Manispaa hii hakika wana Singida hatuna cha kukulipa bali Mungu aendelee kukupa afya njema na maisha marefu ya kuwatumikia wananchi wa Halmashauri ya Wilaya ya Morogoro kufuatia kuaminiwa na Rais Dkt. Samia Suluhu Hassan ambaye amekuhamishia halmashauri hiyo kwa ajili ya kumsaidia kazi.
Mkurugenzi Lupembe ukiwa kama kiongozi wa Manispaa ya Singida kwa nafasi yako umeweza kuifanya Manispaa ya Singida kupiga hatua ya maendeleo kwa kasi kubwa katika sekta ya elimu, barabara, maji, mji kuwa msafi na maeneo mengine mengi ikiwemo ujenzi wa ofisi ya kisasa ya Manispaa ya Singida ambayo ipo eneo la Karakana mjini hapa na haya yote umeweza kufanikiwa kuyafanya kutokana na ushirikiano wako na madiwani, wataalamu na wananchi chini ya nguzo yako ya upendo, ucheshi wako ulionao tangu ulipokuwa Chama cha Skauti Tanzania, kusikiliza maoni yao na kuyafanyia kazi, kuwaunganisha kiutendaji kazi na kuwa kitu kimoja bila ya kuwabagua kwa nafasi walizokuwa nazo.
Mbali ya makundi hayo eneo lingine ambalo limekufanya ufanikiwe ni kushirikiana na viongozi wa Mkoa wa Singida kwa ujumla wao hususani wa Wilaya ya Singida chini ya Mama yetu na mchapa kazi hodari Mkuu wa Mkoa wa Singida Halima Dendego, Mkuu wa Wilaya ya Singida, Godwin Gondwe, Mstahiki Meya wa Manispaa ya Singida, Yagi Kiaratu, Mwenyekiti wa CCM Wilaya ya Singida, Lusia Mwiru, Mwenyekiti wa CCM Mkoa wa Singida Comrade Martha Mlata, Katibu wa CCM Mkoa, Lucy Boniface na vyombo vya usalama.
Jeshi Lupembe ni mengi umetufanyia wana Singida na tunakuomba moto wako wa kazi uliokuwa ukiuwasha Singida nenda kauendeleze katika kituo chako kipya cha kazi huko Morogoro tunasema karibu tena Singida pindi utakapopata nafasi kwetu sisi licha ya kuwa utakuwa mbali nasi lakini kila tutakapo kuwa tukiyaona maendeleo uliyoyafanya utakuwa machoni mwetu daima.
Binafsi nasema kwa heri Jeshi Lupembe na sasa natumia nafasi hii tunakukaribisha Manispaa ya Singida Mkurugenzi wetu mpya Joanfaith John Kataraia ambaye nawe Rais Dkt. Samia Suluhu Hassan amekuamini na kukuhamishia katika kituo kipya cha kazi ili uendelee kumsaidia kama ulivyokuwa ukimsaidia katika Halmashauri ya Wilaya ya Morogoro.
Dada Joanfaith John Kataraia karibu sana Singida na Singida ina watu wakarimu na wapenda maendeleo na kuna vitu vingi vizuri wakiwepo kuku watamu wa kienyeji.
0 Comments