MAMBO KUMI YATAKAYO MPA USHINDI RAIS SAMIA UCHAGUZI MKUU 2025

Rais wa Jamhuri ya Muungano wa Tanzania, Dkt. Samia Suluhu Hassan alipokuwa akila kiapo cha kuwa Rais.

.......................................

UONGOZI ni mamlaka au karama ya kuwaonyesha watu njia kwa vitendo.Kipimo cha uongozi ni jinsi gani kiongozi anaweza kuleta ushawishi kwa watu na kufikia maendeleo yaliyotarajiwa.

Kiongozi bora ni yule ambaye hana muda wa kulalamika bali anatafuta ufumbuzi wa matatizo ya wananchi au watu walio chini yake na akiongea watu husikiliza.

Uongozi ni dhana, taaluma inayompa mhusika madaraka na uwezo wa kuwawezesha wale wanaongozwa naye kuunganisha nguvu, stadi na vipaji vyao na kuvitumia ili kufikia malengo yao.

Aidha, uongozi ni dhana, taaluma anayopewa mtu husika katika kuwaongoza wale waliohitaji kusimamiwa au walioamuliwa kusimamiwa katika kufanikisha jambo fulani kwa maslahi ya wote au ya mtu mmoja mmoja.

Kuna aina nyingi za viongozi na njia za kuainisha uongozi lakini njia ya msingi ni kuangalia jinsi kiongozi alivyoingia madarakani na utaratibu wake wa kuongoza ambapo wapo Wafalme, Marais, Mawaziri, Watemi, Machifu, Wakurugenzi, Viongozi wa dini na wengineo.

Viongozi hao wanaweza kugawanywa katika mafungu yafuatayo kutokana na jinsi walivyoingia madarakani na namna wanavyoongoza kwani wapo waliopata uongozi huo kwa kurithi, kuchaguliwa, wanaojitwalia mamlaka ya kuongoza kwa nguvu,kuteuliwa na mamlaka za juu zaidi.

Imeelezwa kwamba kiongozi anayeingia madarakani kwa mojawapo ya njia zilizotajwa hapo juu anaweza kutumia mtindo wake wa uongozi kama vile uongozi wa kiimla, kidemokrasia.

Uongozi wa kiimla ni mtindo wa kuongoza ambao kiongozi huongoza kwa amri bila kushirikisha watu wengine katika kufanya maamuzi. Mara nyingi uongozi wa aina hii haulengi katika kukidhi maslahi ya walio wengi, bali ya yule anayeongoza na wale wanaomlinda.

Uongozi wa kidemokrasia ni ule wa kushirikisha watu katika kufanya maamuzi na utekelezaji wake na uongozi wa aina hiyo hulenga kukidhi mahitaji ya walengwa.

Viongozi wanaochaguliwa mara nyingi huwa wanapewa muda wa kuongoza, na wale viongozi wanaojiteua hujipatia wao wenyewe muda wa kuongoza au hata hapo watakapoamua kuachia madaraka.

Na sifa za kiongozi bora anatakiwa awe na ufahamu mkubwa juu ya taasisi anayoiongoza, malengo yake, mazingira na matatizo yake, awe mwaminifu, awe  na maadili mema, akubalike na jamii na taasisi anayoiongoza na ili akubalike hana budi kuzingatia maadili ya msingi ya jamii na taasisi yake kwani mtu  mwongo, mlevi, mvivu, asiye mwaminifu hawezi kuwa kiongozi mzuri.

Sifa nyingine ya kiongozi awe mche Mungu, awe anakubalika na watu anaowaongoza, aongoze watu katika misingi bora ya uongozi bila kujali jinsia, rangi, dini wala kabila na kuthamini watu wa makundi yote, awe anakubali kushauriwa ua kupokea ushauri kutoka kwa wengine, awe na uwezo wa kujifunza kutoka kwa watu wengine waliofanikiwa na pia awe na mawazo ya mbele ya kuona tatizo na kuonyesha baadhi ya njia za kulitatua, pamoja na kuona fursa.

Kupitia vyanzo mbalimbali nimeona nianze kuandika makala hii kuonesha jinsi ya kiongozi bora anavyopaswa kuwa leo nitamzungumzia Dkt. Samia Suluhu Hassan Rais wa Awamu ya Sita wa Jamhuri ya Muungano wa Tanzania ambaye anasifa zote za kuwa kiongozi kwani tangu aingie madarakani baada ya aliyekuwa Rais wa Awamu Tano Hayati Dkt. John Pombe Magufuli kufariki na yeye akiwa katika nafasi ya Makamu wa Rais kama katiba ya nchi inavyoekeleza alichukua nafasi hiyo na kuapishwa kuwa kiongozi wa nchi.

Rais Samia ambaye anatoka Chama Cha Mapinduzi (CCM) na Mwenyekiti wa Taifa wa chama hicho aliingia madarakani kidemokrasia kwa kufuata katiba ya nchi na licha ya kuachiwa nchi bila ya kuandaliwa kufuatia kifo hicho amefanya mapinduzi makubwa ya maendeleo katika sekta mbalimbali bila ya kuteteleka kwa usaidizi wa watendaji wake aliowaweka kwa kuendeleza miradi yote ya kimkakati iliyokuwa ikiendelea.

Dkt. Samia ambaye Kamati Kuu ya CCM imempitisha kuwa mgombea wa nafasi ya Urais katika uchaguzi mkuu ana mambo 10 aliyoyafanya ambayo yatampa ushindi mnono wa kura nyingi  kwani baada ya kuchukua madaraka kutoka kwa Dkt. Magufuli mnamo Machi 2021, alifanya mabadiliko muhimu katika nyanja mbalimbali za kisiasa, kijamii, na kiuchumi ungana nami hapa chini kuyajua mambo hayo kumi na baadhi ya hatua alizozichukua:

1.   Kufufua Sera ya Afya ya COVID-19

Rais Samia alirekebisha sera ya awali ya Rais Magufuli kuhusu COVID-19 kwa kuanzisha mpango wa utoaji wa chanjo na kuhamasisha wananchi kuchanja ili kudhibiti maambukizi.

2.    Kufungua Upya Vizuizi vya Vyombo vya Habari

Aliamuru kufutwa kwa marufuku ya vyombo vya habari, ikiwa ni pamoja na kuruhusu tena matangazo ya moja kwa moja ya vikao vya Bunge, hatua iliyokuwa imewekewa vizuizi chini ya utawala wa awali.

3.   Kurejesha Haki za Kisiasa

Rais Samia alifuta marufuku ya mikutano ya kisiasa iliyokuwa imewekwa kwa miaka sita, akisisitiza umuhimu wa vyama vya siasa kufanya mikutano yao kwa amani na kwa kufuata sheria.

4.    Kufufua Uhusiano wa Kidiplomasia

Alifanya ziara za kimataifa katika nchi mbalimbali, ikiwa ni pamoja na Kenya, Uganda, Rwanda, China, na Umoja wa Falme za Kiarabu, ili kuboresha uhusiano wa kibiashara na kisiasa.

5.    Kusaini Mikataba ya Biashara

Aliingiza mikataba ya biashara na nchi mbalimbali, ikiwa ni pamoja na mikataba ya kifedha kutoka Umoja wa Ulaya na mikataba ya uwekezaji kutoka Dubai, ili kuimarisha uchumi wa Tanzania.

6.    Kufufua Sekta ya Utalii

Alizindua filamu ya "The Royal Tour" ili kutangaza vivutio vya utalii vya Tanzania, hatua iliyochangia ongezeko la idadi ya watalii na mapato kutoka kwa sekta ya utalii.

7.    Kupanua Elimu ya Juu

Aliongeza bajeti ya mikopo ya elimu ya juu kutoka Sh. Bilioni 464 hadi bilioni 656, na kuongeza idadi ya wanafunzi wanaonufaika na mikopo hiyo, ili kuboresha upatikanaji wa elimu ya juu.

8.    Kurekebisha Sera za Kijinsia

Aliondoa sera iliyokuwa inakataza wasichana wajawazito kurudi shule, akisisitiza haki ya elimu kwa wasichana wote bila ubaguzi.

9.    Kufanya Mageuzi ya Kikatiba

Aliunda kamati ya mageuzi ya kikatiba ili kutoa mapendekezo ya kuboresha mfumo wa kisiasa na kikatiba wa Tanzania, ingawa baadhi ya mapendekezo yalicheleweshwa hadi baada ya uchaguzi mkuu wa 2025.

10. Kusimamia Uchaguzi wa Kidemokrasia

Aliweka mkazo katika kuhakikisha uchaguzi wa haki na uwazi, akisisitiza umuhimu wa tume huru ya uchaguzi na haki ya kupinga matokeo ya uchaguzi mahakamani.

                                    MIRADI ILIYOTEKELEZWA

Baada ya kuchukua madaraka mnamo Machi 2021, Rais Samia Suluhu Hassan ameendeleza na kuzindua miradi mikubwa ya kimkakati inayolenga kukuza uchumi, kuboresha miundombinu, na kuongeza ajira nchini Tanzania. Hapa chini ni baadhi ya miradi muhimu aliyoanzisha au kuendeleza:

1. Ujenzi wa Reli ya Kisasa (SGR)

Rais Samia ameendelea na utekelezaji wa mradi wa reli ya kisasa (SGR) unaounganisha Dar es Salaam na Dodoma. Reli hii ya kilomita 541 inatarajiwa kuongeza ufanisi katika usafirishaji wa abiria na mizigo, na kusaidia kukuza biashara na uchumi wa kanda. Mradi huu unagharimu dola bilioni 3.1 na unatekelezwa kwa ushirikiano na kampuni ya Yapi Merkezi kutoka Uturuki.

2. Bwawa la Umeme la Julius Nyerere (JNHPP)

Rais Samia ameanzisha uzalishaji wa umeme kupitia mtambo wa kwanza wa bwawa la Julius Nyerere, lenye uwezo wa kuzalisha megawati 235. Mradi huu unalenga kuongeza upatikanaji wa umeme nchini na kupunguza uhaba wa nishati. Hata hivyo, mradi huu umekosolewa na wahifadhi wa mazingira kutokana na athari zake katika Hifadhi ya Selous.

3. Ujenzi wa Samia Suluhu Hassan Stadium

Katika kujiandaa na michuano ya Kombe la Mataifa ya Afrika (AFCON) mwaka 2027, Rais Samia ameanzisha ujenzi wa uwanja wa kisasa wa Samia Suluhu Hassan mjini Arusha. Uwanja huu utakuwa na uwezo wa kuchukua watazamaji 30,000 na unatarajiwa kumalizika mwaka 2026.

4. Mkataba wa Usimamizi wa Bandari na DP World

Serikali ya Rais Samia ilisaini mkataba na kampuni ya DP World kutoka Dubai kwa usimamizi wa sehemu ya bandari ya Dar es Salaam. Lengo ni kuboresha ufanisi wa bandari na kuongeza mapato ya serikali na tija ya mkataba huo unaonekana.

5. Uboreshaji wa Sekta ya Kilimo

Rais Samia ameongeza mtaji wa Benki ya Maendeleo ya Kilimo (TADB) kutoka shilingi bilioni 60 hadi bilioni 435.4, ili kuhamasisha kilimo cha kibiashara. Aidha, serikali imeanzisha programu ya "Build a Better Tomorrow" inayolenga kuwajengea uwezo vijana na wanawake katika kilimo.

6. Ujenzi wa Daraja la Kigongo–Busisi

Serikali immemaliza ujenzi wa daraja la Kigongo–Busisi linalounganisha maeneo ya Kigongo na Busisi katika Ziwa Victoria. Mradi huu unalenga kuboresha usafiri na kukuza uchumi katika kanda ya Ziwa

7. Miradi ya Barabara na Miundombinu

Rais Samia ameendelea na utekelezaji wa miradi ya barabara na miundombinu, ikiwa ni pamoja na ujenzi wa barabara kuu za mikoa na madaraja, ili kuboresha usafiri na kukuza uchumi wa taifa.

8. Miradi ya Nishati na Umeme

Serikali imeanzisha miradi ya kuzalisha umeme, ikiwa ni pamoja na ujenzi wa mitambo ya umeme wa maji na upepo, ili kuongeza upatikanaji wa nishati na kupunguza uhaba wa umeme nchini.

9. Miradi ya Afya na Elimu

Rais Samia ameongeza bajeti ya sekta ya afya na elimu, ikiwa ni pamoja na ujenzi wa hospitali na shule mpya, ili kuboresha huduma za afya na elimu kwa wananchi.

10. Miradi ya Maji na Mazingira

Serikali imeanzisha miradi ya usambazaji wa maji safi na salama, pamoja na uhifadhi wa mazingira, ili kuboresha hali ya maisha ya wananchi na kulinda vyanzo vya maji.

Miradi hii ni sehemu tu kati ya miradi mingi ambayo imetekelezwa chini ya uongozi wake na inayoendelea kutekelezwa na utekelezaji wa miradi hii  inaonyesha juhudi za dhati za Rais Samia katika kuendeleza na kuboresha miundombinu ya taifa, kukuza uchumi, na kuboresha huduma za jamii.

KUHUSU KUSAIDIA MAKUNDI MAALUM

Rais Samia Suluhu Hassan ameanzisha na kuendeleza juhudi mbalimbali za kuwasaidia makundi maalum nchini Tanzania, ikiwa ni sehemu ya dhamira yake ya kukuza usawa na maendeleo kwa jamii nzima. Hapa chini ni baadhi ya hatua muhimu alizochukua:

1. Sheria ya Ununuzi wa Umma ya Mwaka 2023

Rais Samia alianzisha sheria hii inayotaka taasisi za serikali kutenga asilimia 30 ya zabuni zote kwa ajili ya makundi maalum, ikiwa ni pamoja na wanawake, vijana, walemavu, na wazee. Mfumo wa NeST (National e-Procurement System) umewezesha utekelezaji wa sheria hii, ambapo hadi Februari 2025, makundi maalum yalipata zabuni zenye thamani ya zaidi ya shilingi bilioni 11. Kati ya hizo, zaidi ya shilingi bilioni 5.6 zilitolewa kwa vikundi vya wanawake.

2. Msaada wa Sikukuu kwa Makundi Maalum

Katika kipindi cha sikukuu za mwisho wa mwaka, Rais Samia alitoa msaada kwa vituo 14 vya watoto wanaoishi kwenye mazingira magumu na makazi ya wazee mkoani Tanga. Zawadi zilizotolewa ni pamoja na mbuzi, mchele, mafuta ya kupikia, sabuni, maharage, na sukari. Lengo la msaada huu ni kuwafanya wanajamii hawa kujisikia kuwa sehemu ya jamii na kusherehekea sikukuu kwa furaha.

3. Msaada kwa makundi maalum mkoani Dodoma

Rais Samia alitoa msaada kwa watoto wanaoishi kwenye makao na shule maalum mkoani Dodoma. Msaada huo ulijumuisha magodoro, mashuka, mablanketi, sukari, maharage, mafuta ya kupikia, unga wa ngano, na mchele. Msaada huu ulitolewa ili kuboresha hali ya maisha ya watoto na watu wenye mahitaji maalum katika mkoa huo

4. Msaada kwa Makundi maalum mkoani Tabora

Katika mkoa wa Tabora, Rais Samia alitoa msaada kwa vituo mbalimbali vya huduma za jamii, ikiwa ni pamoja na vituo vya kulelea watoto yatima, wazee, na walemavu. Vitu vilivyotolewa ni pamoja na mafuta ya kula, mbuzi, mchele, unga wa ngano, mahindi, na juisi. Msaada huu ulisaidia vituo hivyo kuyamudu maisha ya kila siku na kuboresha huduma kwa wanufaika.

5. Uhamasishaji wa Ujasiriamali kwa Makundi Maalum

Rais Samia ameendelea kuhamasisha makundi maalum, hasa wanawake na vijana, kujishughulisha na ujasiriamali. Serikali imeanzisha programu mbalimbali za kutoa mafunzo na mikopo kwa makundi haya ili kuwawezesha kujiajiri na kuchangia katika uchumi wa taifa.

Kwa jumla, Rais Samia Suluhu Hassan ameonyesha dhamira ya dhati katika kuwasaidia makundi maalum nchini Tanzania kupitia sera, sheria, na utekelezaji wa miradi mbalimbali.

VIONGOZI WA DINI WANAVYO MZUNGUMZIA RAIS SAMIA

Viongozi wa dini nchini Tanzania wanamzungumzia Rais Samia Suluhu Hassan kwa mtindo wa ushirikiano na usimamizi wa maadili, huku wakisisitiza umuhimu wa dini katika kuimarisha jamii yenye maadili, amani, na mshikamano.

Katika Baraza la Eid El-Fitr lililofanyika Machi 31, 2025, Rais Samia alisisitiza umuhimu wa viongozi wa dini kudumisha amani ya nchi na kuepuka kutumia majukwaa ya kiimani kwa madhumuni ya kisiasa. Aliwahimiza viongozi wa dini kuendelea kuwalea waumini wao kiroho na kuepuka kupandikiza chuki dhidi ya serikali.

Rais Samia amekuwa ni kiongozi wa dini zote kwani licha ya kuwa ni Muislam tumeona ambavyo amekuwa akisaidia makanisa mbalimbali kwa kutoa misaada hadi kufikia baadhi ya viongozi hao kupendekeza awe Mama wa Taifa la Tanzania.

KATIKA KUSIMAMIA HAKI

Katika suala zima la kusimamia haki tumeona hatua mbalimbali ambazo amekuwa akichukua kama ujenzi wa mradi wa Mahakama ya haki za binadamu na watu barani Afrika unaotekelezwa eneo la Lakilaki, Kata ya Kisongo Wilayani Arumeru mradi ulioanza kutekelezwa tarehe 28/ 08/ 2023 kwa gharama ya Sh. Bilioni 62.9 ukijumuisha majengo sita, unatarajiwa kukamilika mwishoni mwa mwaka huu wa 2025.

Jitihada zingine ambazo amekuwa akizifanya ni kuboresha miundombinu ya mahakama kwa kujenga ofisi kila mkoa nchini.

Katika shughuli mbalimbali za kimahakama kwenye hutuba zake amekuwa akihimiza Majaji na Mahakimu kutenda haki bila ya kumuonea mtu na kesi wanazozisikiliza zisichukue muda mrefu bila ya kuwa na sababu zozote.

Rais Samia baada ya kuona changamoto kubwa katika eneo hilo la haki alianzisha kampeni ya msaada wa kisheria ya Mama Samia ambayo chini ya Wizara ya Katiba na Sheria kwa kuwahusisha wanasheria mbalimbali wali kwenda mikoa yote kusikiliza kero za wananchi hasa kwenye eneo la mirathi na migogoro ya ardhi kampeni ambayo imeonesha kuwa na mafanikio na tija kubwa kwa wananchi. 

  WANANCHI WANAVYO MZUNGUMZIA RAIS RAIS SAMIA

Mkazi wa Kitongoji cha Nyatanga kilichopo Kibiti Mkoa wa Pwani Pili Athumani anasema Rais Samia amefanya kazi kubwa katika eneo lao kwa kuwajengea Hospitali ya Wilaya ambayo imekuwa ni mkombozi kwao hasa kwa wanawake na watoto kwani awali walikuwa wakitegemea kituo cha afya pekee.

“Mnyonge mnyongeni lakini haki yake apewe kazi kubwa imefanywa na Mama Samia na kila mtu katika wilaya yetu hawezi kusema hajaiona tunachomuomba atusaidie kutuletea maji kwani ndio changamoto yetu kubwa tuliyo nayo hivi sasa tunatumia maji ambayo tumeletewa na waturuki ambayo hayatutoshelezi,” alisema Pili.

Mwalimu Happines William mkazi wa Mkuranga Mkoa wa Pwani amempongeza Rais Samia kwa kujali watumishi pale alipoongeza kima chini cha mshahara jambo ambalo ni Baraka kwake kutoka kwa  Mwenyezi Mungu.

Godlove Mhando mkazi wa Kiteto mkoani Manyara anasema kura yake atawapigia viongozi wa CCM kwani kupitia ilani yao ya uchaguzi ya mwaka 2020/ 2025 chini ya Rais Samia wameitendelea haki na sasa wanategemea mambo mazuri na makubwa zaidi katika ilani ya 2025/ 2030 itakayo zinduliwa Mei 29, 2025 katika mkutano mkuu maalum utakaofanyika jijini Dodoma.

Mwenyekiti Mstaafu wa Kata ya Kivule Ilala Jijini Dar es Salaam, Joseph Gassaya ambaye pia ni Mwenyekiti wa baraza la wazee wa kata hiyo bila ya kumung’unya maneno amewaomba Watanzania kumrejesha madaraka Rais Dkt. Samia Suluhu Hassan kwa kumpa kura nyingi wakati wa uchaguzi mkuu unaotarajiwa kufanyika  Oktoba mwaka huu.

 “Mfano mimi ni Mwenyekiti wa Baraza la Wazee Kata ya Kivule ninapokutana na wazee wanaonesha kufurahishwa na huduma mbalimbali za kijamii zikiwamo elimu na afya zinavyopatikana karibu yao tofauti na vipindi vya uongozi uliopita.

”Niwaombe wazee wenzangu na wananchi kwa ujumla wao wakati wa uchaguzi ukifika kura zote apigiwe mama Samia na viongozi wengine wote wanaotokana na Chama Cha Mapinduzi (CCM) yaani Diwani na Mbunge kwani Rais Samia amefanya kazi kubwa,” alisema Gassaya.

Paul Hema mkazi wa Kijiji cha Puma Wilaya ya Ikungi mkoani Singida anasema kazi kubwa iliyofanywa na Rais Samia kwa miaka minne ya uongozi wake ni kazi ya kutukuka hivyo anapaswa kuungwa mkono na kila mpenda maendeleo yeyote wa nchi hii na kuwa zawadi pekee ya kumpa ni kura nyingi na za kishindo.

MACHIFU WANAVYOMUONGELEA RAIS SAMIA

Kwa upande wake Chifu wa Kabila la Wasafwa la Mkoa wa Mbeya Loketi Masoko Mwashinga anasema Rais Samia amefanya kazi kubwa ya kuwaunganisha  machifu wote wa Taifa la Tanzania na ndio maana na wao wakaamua kumpa cheo cha chifu mkuu na kumsimika rasmi mkoani Mwanza na kumpa jina la Hangaya lenye maana ya 'Nyota njema ya asubuhi ambayo inang’aa'

Alisema machifu licha ya kuwa watu muhimu kwa ajili ya kusimamia maadili katika jamii kwa siku nyingi walisahurika lakini Rais Samia amewakumbuka na kuwapa heshima kubwa ambapo wamemuomba waingizwe katika mfumo wa kutambulika rasmi na kwamba hivi sasa wapo kwenye mchakato wa kuanzisha taasisi yao.

“Binafsi niwaombe machifu wenzangu kote nchini kwa jambo alilotufanyia Rais wetu tusimuangushe wakati ukifika wa uchaguzi tumkumbuke,” alisema Chifu Mwashinga.

Seneti ya Vyuo na Vyuo vikuu ambayo ipo chini ya Umoja wa Vijana wa Chama Cha Mapinduzi (UVCCM) kupitia Mkuu wa Idara ya Uhusiano wa Kimataifa wa seneti hiyo Taifa,  Emmanuel Martine amesema Rais Samia asiwe na wasiwasi wowote kwani tayari anakura milioni tatu kutoka kwa seneti hiyo. 

Kwa upande wake Mwenyekiti wa Shirikisho la Vyama vya Watu wenye Ulemavu Mkoa wa Dar es Salaam, Charles Matemba alisema, Rais Samia amewaboreshea huduma  ukiwemo ushirikishwaji katika masuala mbalimbali.

“ Katika kipindi hiki cha miaka minne ya uongozi wake walemavu tumekuwa tukipata fursa za kushiriki semina na kuhudhuria makongamo na hasa kushirikishwa kwenye mchakato mzima wa uchaguzi jambo ambalo ni kubwa na la heshima kwetu,” alisema Matemba.

 Elizabeth Kinyalwa, Mkazi wa Kijiji cha Vihingo wilayani Kongwa amesema kupitia kampeni ya msaada wa kisheria ya Mama Samia imekuwa ni msaada mkubwa hasa kwa wanawake kwenye upande wa mirathi kwani wamekuwa wakidhulumiwa mali na ndugu wa mwanaume pindi umauti unapomkuta mume na wao hawakujua wapi pa kuanzia kudai haki zao.

“Ni kawaida hapa kwetu mara mume anapofariki mwanamke hunyang’anywa mali zote ambazo kashirikiana na mumewe kuzichuma na watoto pia wanachukuliwa huku mwanamke akiachwa bila kitu kwa kigezo kuwa ataolewa tena, hivyo tunamshukuru sana Rais wetu na Wizara ya Katiba na Sheria kwa kutuletea kampeni hiii.” alisema bibi Elizabeth. 

Makala hii imeandaliwa na Dotto Mwaibale namba ya simu (0754362990) Email dotomwaibale@gmail.com.

Rais wa Jamhuri ya Muungano wa Tanzania Mhe. Dkt. Samia Suluhu Hassan alipokuwa akielekea kupanda treni ya umeme (SGR) katika Stesheni ya Dodoma wakati akielekea Jijini Dar es Salaam Januari 22,2025.

Muonekano wa daraja la Magufuli la Kigongo Busisi lililopo mkoani Mwanza.

Muonekano wa Bwawa la kufua umeme la Mwalimu Nyerere.

Muonekano wa Treni ya Kisasa ya SGR.

Muonekano wa eneo lingine la Reli ya Kisasa SGR.

 Rais wa Jamhuri ya Muungano wa Tanzania Dkt. Samia Suluhu Hassan ambaye pia ni Mwenyekiti wa Taifa wa Chama cha Mapinduzi (CCM) akipeana mkono na Katibu Mkuu wa chama hicho wakati kilipopitisha azimio la kumteua kuwa mgombea wa nafasi ya urais katika uchaguzi mkuu unaotarajiwa kufanyika mwaka huu. Azimio hilo pia lilimpitisha Rais wa Zanzibar Dkt, Hussein Ali Mwinyi kuwa mgombea wa Urais Zanzibar na Katibu Mkuu wa CCM Taifa Balozi Dkt. Emmanuel Nchimbi kuwa mgombea mwenza wa Dkt. Samia. CCM chini ya viongozi hawa ndio kinatekeleza ilani ya uchaguzi ya mwaka 2020/ 2025 ambayo imafanya vizuri na taarifa rasmi ya utekelezaji wa ilani hiyo itatolewa Mei 29, 2025 katika mkutano mkuu maalumu wa chama hicho utakaofanyika Ukumbi wa Jakaya Kikwete Convention Center Jijini Dodoma ambapo pia ilani ya chama hicho ya 2025/2030 itazinduliwa.

Rais wa Jamhuri ya Muungano wa Tanzania, Mhe. Dkt. Samia Suluhu Hassan akijumuika na Viongozi wa Siasa, Serikali, dini na makundi maalum kwenye Iftar aliyowaandalia katika viwanja vya kufurahisha watoto vya Tibirinzi, Wilaya ya Chake chake mkoa wa Kusini Pemba, Zanzibar Machi 24, 2025 na kuonesha jinsi anavyo wajali wenye uhitaji.